何君堯就港獨「殺無赦」事件經過成個星期發酵，再加上何被踢爆原來喺英國同新加坡都唔係執業律師，泛民一方見到呢位建制重炮手一面炮灰當然個個瞓瞓下都笑醒，但笑嘅又點止得泛民？

　　率先出嚟「笑」嘅建制，首推係新民黨主席葉劉淑儀。佢喺Facebook一句「Loving our country does not mean acting or speaking in a stupid way，like Junius Ho yesterday」，真係一支「頂心杉」插中何君堯心口。葉太直腸直肚性格，亦都反映咗佢去到今時今日，真係無欲無求，自然講嘢唔使咁多顧忌。至於其他建制派，雖然同何君堯係同路人，但聽聞何君堯平時性格真係幾目中無人，令到建制派早就對佢有微言，今次事件之後，建制派私底下講起何君堯都擰擰頭；就好似有報章報道，民建聯葛珮帆向友好發短訊，指「個別人士的態度問題是個人問題，不宜攬炒建制派，影響建制陣營士氣」，正正顯示大部分建制派，就算唔對何君堯落井下石，都要同佢保持適當距離。

　　不過Tina就聽聞，唔止一個建制黨派嘅代表，都已經向西環力數何君堯，何嘅背脊唔知被「盟友」篤咗幾多下。何君堯今次企到最前、最高調咁反港獨，可以話係緊跟阿爺路線，建制又可以話到佢乜？不過，去得篤背脊嘅當然係充滿智慧嘅。聞說其中一位建制元老級同西環講，話何君堯係「愚愛國」，言論畀位反對派「入」，仲將建制派所佔嘅反港獨道德高地，一下子被佢嘅言論分散晒輿論注意力，令到反港獨「事業」被佢拖咗後腿；另外一位建制派就向西環力數何君堯最大罪行就係過度挑起仇恨，令到特首林鄭月娥上任以來打嘅和解牌打唔成，會影響特區政府未來管治云云。

　　何嘅背脊花到一撻撻，咁西環又有咩反應？張曉明剛剛先升官北上，新主任王志民上任無耐，當然唔會有任何明示暗示。不過，熟悉西環思路嘅朋友就話，何君堯係難得一位具份量嘅重炮手，又係專業人士又係民選議員，絕無可能係會成為棄將，相信單計今次事件絕唔會令到佢喺阿爺面前失分。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇