立法會重現上年開會初期因為梁游宣誓而引發嘅混戰，大會更因為過度混亂而被主席宣布休會。混亂結束，要算一算這盤混帳。

　　首先，係建制陣營，包括埋特首林鄭月娥。對林太，Tina一直都帶有幾分敬意，但今次事件真係要商榷。其實，成個議案由始至終都毋須拎上立法會，呢個好多人都講過。而明知拎呢個議案既無法律效力，仲會畀個位泛民「拉布」；Tina認為不如唔好搞咁多，就咁「三步走」走完佢就算。

　　而由林鄭第一日抽起樓市辣招嘅議案，好明顯佢哋都已經知道「一地兩檢」議案係硬仗一場，亦都已經預咗泛民係會打「拉布」啦，但點解唔好好協調成班建制派，諗吓計可以點樣迎戰呢？成個議案，建制派可以話係被泛民牽住鼻子走；一開始，據聞建制派都係諗住大家表晒態就可以投票玩完，到後來由於泛民拉布，建制派就收到Order，協調各黨派盡可能一個人講15分鐘，其他草草講完表吓態就算，等議案可以順利今個星期可以通過，但最終都係未能完成。

　　第二混帳，當然係泛民或者非建制派。「一地兩檢」有無爭議？咁肯定係有，但道理係唔係全部喺非建制派嗰邊？一開始用到「割地兩檢」呢類講法就已經係匪夷所思，除非佢哋認為香港唔屬於中國一部分。當民意唔係完全企晒喺佢哋嗰邊嘅時候，將另一半民意棄之不顧，又係唔係代議士應有嘅行為？佢哋又係唔係偏聽呢？

　　最混帳嘅，Tina個人認為，一定係主席梁君彥。由佢坐正第一日處理梁游事件，已經知道呢位大主席同曾大主席真係爭幾遠；估唔到做咗年幾，功力仲未夠喉。噚日朱凱迪喺大會上提出用88條(1)，要求傳媒同公眾人士離開會議廳嘅議案；雖然規則講明係毋須預告做動議，但Tina覺得當時第一刻梁君彥應該係諗個理由唔畀佢提呢個議案，效果點都係好過開咗個頭又唔畀佢哋講更好。Tina諗，如果一開始就唔畀佢提88條(1)，可能都係會有混亂，但最終又會唔會「休會」收場呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇