呢兩個星期，姓馬嘅可以雄霸晒媒體嘅版面。體育、演藝、文化及出版界嘅立法會議員馬逢國，帶住一支髮Gel喺機場過關，涉嫌以立法會議員個名頭再加上「識得」機管局主席林天福嘅言論，成功令到機場保安放行過關，惹來一場前特首梁振英以來最大單嘅過關風波。港鐵主席馬時亨周末接力，一句「我地話你聽OK就得㗎喇」嘅神回應，亦都激起港鐵「大老闆」-普羅大眾嘅神經。不過暫且放過馬主席，主力講返馬議員。

　　髮Gel風波來自一位建制派功能組別議員，其實一啲都唔意外。建制功能組別，本來就係小圈子中嘅小圈子，當中不乏靠攀附「權貴」上位之人，成功取得權力；喺佢地眼中，佢地嘅權力係高人一等，尋常百姓做唔到、去唔到嘅，佢地都做到、去得到。呢場風波，正正係揭示佢地一直以來嘅精英特權心態，但點都好，髮Gel事件充其量係反映佢自己嘅人格，對市民社會無乜實際大影響。

　　但噚日法庭判咗電影道具鈔票案，馬議員嘅處理真正影響緊整個社會。呢單案由警察拉人封艇到律政司決定落案起訴，每一階段都已經畀市民詬病，本來大家都有一絲希望由官判無罪大團員結局，點知最終都係要判入罪，全城嘩然。

　　咁馬逢國喺案件審完之後做過乜？Well，Tina查過咁多報紙，只係搵得到尊貴嘅馬議員少量回應，佢就話「若法例豁免電影拍攝問題較複雜，修例亦有困難，但認為需有合理安排，稱一定會在立法會跟進事件，要求政府檢討相關法例」。一宗連普通市民都覺得被告受冤嘅案件，作為業界代表只係咁簡單一句回應？點解唔即刻聯同電影界大佬搞記招怒斥政府法例過時嚴苛？點解唔公開撐被告上訴？好難想像一個喺機場好勇武咁捍衛自己支髮Gel嘅尊貴功能組別議員，竟然喺自己組別有事發生嘅時候，無去充分咁展現佢嘅功能。如果連自己界別嘅人都旨意唔到佢嘅時候，我地一班小市民又點可以旨意呢位議員，可以喺民生議題上投票時，為我地謀求福祉呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇