上個星期政圈嘅風眼又再次圍住特首林鄭月娥來轉。

　　林鄭先喺七一酒會同傳媒茶聚時爆出一句「我個人支持填海，亦是政府一直推動的方案之一」，即時被輿論批評佢土地大辯論嘅諮詢都未完就先講明自己嘅立場，擺到明係「假諮詢」云云。

　　呢單未燒到熱辣辣，佢再喺記者面前失言，回應英文媒體提問時，竟然話有關問題已經用廣東話答咗，要用英文重複係「浪費時間」。呢個回應將林鄭身邊嘅火頭推到上鼻哥咁高。

　　兩單嘢雖然係獨立事件，但兩單都有一個共通點，都係顯示出林鄭非常急躁。先講第一單，諮詢係政府主動發起做嘅，正常程序，政府亦好應該等諮詢完早喇先再講下政府立場意見，但林鄭可能就急住要喺施政報告對土地政策有新著墨，急不及待咁就同傳媒講自己支持填海，令到港人普遍都有政府做假諮詢嘅感覺。

　　第二單就更加離奇。熟悉傳媒運作嘅人都知，本地傳媒問完廣東話問題，英文媒體都會問返類似嘅同一條，因為英文媒體都希望受訪者可以用英文講一次，有聲有畫面先可以向觀眾聽眾交待，過去幾十年都係咁。林鄭作為殖民地官員，滿口英式英文嘅佢，話佢唔鍾意用英文回答就對人多過對事，但為官幾十年嘅佢都好應該係習慣香港傳媒呢種先中後英嘅生態，「浪費時間」之說，唔係急性子又會係乜？

　　Tina向幾位官場中人打聽，佢地大多對於林鄭呢排起咁多火頭都感到莫明奇妙。不過其中一位嘅講法，就值得深思。呢位官員就指出，林鄭一向係事事上心，唔好話土地發展咁大件事，小如對罕見病嘅支援，佢都事事親為，依家一日廿四小時絕對唔夠佢用，所以佢咩都急，唔想浪費時間絕對係事實。

　　呢位官員最後一句就最令人茅塞頓開，佢話：「你覺得特首會做幾多年？佢想做多一任，阿爺可能都未必首肯，所以好可能如佢之前所講，做足五年就陪家人，五年時間要做佢想為香港做嘅嘢，絕對唔容易呀，係同時間競賽…唔急躁又點得呢？」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票