昨日(11月12日)相信作為香港人，無論你係乜嘢政治取態，只要你地睇下新聞報道，相信都無幾多個會瞓得安樂。Tina捱到2點幾頂唔順瞓咗，到6點半自動彈起身，即刻開手機睇即時新聞，睇下有無不幸事件發生，慶幸情況只係最壞，未有更壞。

　　我知呢個時勢仲喺度扮中立真係最衰格，但往往呢個時候，好似兩公婆鬧交鬧到乜嘢小事都拎出來數，對修補關係係零幫助，有必要是旦一方都要肯行返去中間睇返整件事。

　　支持學生嘅人，你地睇到警察點樣使用過分武力、睇到警察點樣出爾反爾想攻入大學而令到你地「義憤填膺」，作為終極和理非嘅Tina都非常明白，亦都非常同情，但同樣地，你地又睇唔睇到學生為反抗自製汽油彈？睇唔睇到學生都同樣違法使用可致命武力想傷害前線警察？至於支持警察執法嘅人，包括我地嘅特首林鄭月娥，點解永遠覺得警察執法，無論過程有幾咁暴力，一句「天經地義」就可以帶過？點解永遠只係將責任歸咎畀學生？一方面批評示威者、暴徒視法治如無物，咁手執權力卻使用超過權力限制嘅方式去平暴，平完又可以無後果嘅，咁又係哪碼子嘅「法治」？

　　說穿了，其實大家都係「阿叻」，只係睇到自己想睇到嘅嘢，一啲唔啱睇、唔啱聽嘅，抹過就充耳不聞，呢種情況由好幾個月前已經開始，亦令到雙方嘅嫌隙愈來愈深，依家睇情況已經去臨界點，接近收唔返嘅邊緣，惟有上天眷顧先可化解。

　　Tina並唔係教徒，亦從來唔信任何宗教，但呢一刻，我真係希望所有有信仰嘅香港人，都為香港能夠大步檻過向佢地嘅神祈禱，亦特別希望林鄭成日掛住喺口邊嘅天父，能夠還林鄭只怕係一丁點嘅憐憫心同智慧，等佢可以解決嘅就解決，解決唔嚟就唔該過主，做下好心得唔得呀……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇