執筆之時，區議會選舉結果未出晒，但都已經塵埃落定，452席區選席位之中，泛民一方豪奪近400席，建制派由上屆擁有近300席，大幅縮減至約60席。如果以成幅圖畫去睇，泛民候選人共取得近290萬名選民嘅近六成選票，建制派取得近四成，重回一直以來政圈默認嘅泛民建制六四「黃金比例」。

　　今次選舉泛民大勝可以話令到建制始料不及。雖然唔少親自落場競選嘅建制前線都感受到嗰股「民意」，唔少候選人出聲要押後選舉，但禮賓府、建制元老甚至係西環人士賽前評估都認為，輸就應該會輸，但點都無可能會輸到03年咁衰，喺反暴力聲之下，四成席位點都會有，無謂延遲惹來更大風波，點知就輸到一敗塗地。

　　泛民今次大勝，Tina相信並唔代表香港主流民意係支持暴力，不過反修例事件喚醒咗一代政治冷感嘅香港人，重新去睇、去感受今時今日香港嘅獨有政治。投票結果顯示，泛民支持者唔會將票投泛民就同支持暴力(呢個係建制派之前一直想營造嘅睇法)劃上等號，大家都只係有一個「唯一」嘅政治表態，就係唔妥政府喺修例事件一路以來嘅處理方法，更不滿建制派一直以來同政府同林鄭「緊密Connect」，令到建制派議員無論做得幾好，牌頭掛住建制標簽嘅就等同幫政府，呢個就係原罪。更有建制派落選人士指，今次林鄭由頭到尾一直領導呢一場「建制派連根拔起」運動，唔單止令選民政治醒覺，更將會成功推建制派站向政府嘅對面，以後政府要建制派合作將會難上加難，政府管治能力跌入深淵。

　　建制大敗，輸到慘不忍睹，政府仲未出來回應，容許Tina預測，政府嘅「Line to take」大約會係「好高興見到咁多市民踴躍投票去支持認為幫佢地嘅候選人，亦都證明香港人係熱愛和平，可以好和平咁完成今次選舉。特區政府會同新一屆區議會通力合作，為市民多做地區實務….」bababa，如果仲係「講呢啲」，無清清楚楚回應市民嘅聲音，包括成立獨立調查委員會甚或至推動更民主選舉等等，我好相信，暴力喺選舉之後會重來。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票