林鄭噚日(8日)公布第二輪防疫抗疫基金，以「保就業」為大前提，資助規模達到1375億元。今次落藥似乎就幾猛，起碼幫到中小企出下人工，等佢地停止裁員，大家可以渡過難關，但由於現時有關嘅細節都並未公布，亦相信政府係會繼續微調，討論呢個方案夠唔夠實際暫時係過早。

　　不過，伴隨呢份千億紓困措施，仲有嘅係林鄭同問責官員宣布減薪一成，同各位被裁、被減薪、被停職嘅市民共渡時艱。

　　喺依家呢啲歷史難見嘅艱難時刻，政治人物減薪，梗係體現政治問責嘅表現，亦係佢地爭取民意支持嘅最佳做法，正常就梗係得到民眾嘅認同，增加民望。但正如Tina前幾篇文都講過，同一樣嘅做法或者政策，錯失公布嘅時機，效果可以有天淵之別。林鄭當初唔選擇喺捐一個月人工嘅時候同時宣布自減一成，而係喺被立法會議員審議財政預算案期間發現到佢每月加薪一萬之後，先至喺社會壓力，包括建制派壓力之下宣布呢個決定，同你平時行出行入唔戴口罩又唔勤洗手，到發現自己中咗肺炎病毒後先加強個人衛生，效果絕對係一樣。

　　都要同林鄭講返佢公道說話，以佢咁「日理萬機」，連老公林生嘅生日都好可能唔記得，又點會記得上年係咁而每個月加咗一萬蚊人工？當一個人連八達通都唔識得用、廁紙又唔知喺邊度買、隨手拎張五百大元打賞畀一個老人家，Tina真心相信，呢個人對自己嘅錢財身家係零概念，亦唔會理自己每個月出緊幾錢糧，要佢先知先覺喺全民水深火熱期間主動講唔加自己人工，絕對係大家嘅對佢嘅苛求。

　　但當全球政治領袖都已經自願減薪，作為全球最高人工一批政治人物嘅你，又無乜理由唔知，叫你早早跟風減薪，絕對係基本要求。你自己當刻都唔醒水，只好講一句：「你真係唔識政治㗎喎！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好