現任特首林鄭月娥同埋前任特首梁振英，兩個人之間有心病嘅傳聞，政圈早早就已經瘋傳，特別係林鄭當選初期又未正式上任，唔少團體搞活動，一請就請晒佢兩位「老人家」到場，兩人除咗會喺台上握手打個門面招呼以外，據聞台下全程零交流，寒喧話都無半句。

　　兩任特首「心不和」嘅講法，由反修例事件以後到最近疫情持續惡化以來，逐漸浮到上水面。最令Tina印象深刻嘅係，去年CY喺自己Facebook「狙擊」個別官員，「為官避事平生恥」更成為佢嘅必備Hashtag，最終政府動用《教育條例》取消專業失德教師嘅資格，林鄭更加話，咁係體現本屆政府嘅決心，仲話「以往嘅政府」做事比較「避難」，但今屆政府會迎難而上回應訴求。搞到之後CY都要喺公開場合回應，話自己做特首年代一直迎難而上。

　　剛剛CY又再一次發功，失驚無神咁提出，特首選舉就算改由協商產生，亦未有違反《中英聯合聲明》同《基本法》，而林鄭日前被記者問到時，林鄭隔空反駁，話《基本法》雖寫明特首選舉可以通過協商或選舉產生，但係香港回歸以來，特首都係透過選舉產生，「我覺得無論從歷史發展角度，或從現實一場選舉為社會帶來果個效益，行政長官以選舉產生係比較好」。足以證明，兩任特首依家正處於最嚴峻嘅「政治較量」之中。

　　有建制派指出，今次CY無啦啦拎特首選舉方式出嚟講，其實係有跡可尋。佢指出，之前已經盛傳人大將可能再次延遲立法會選舉，以處理直選可能為香港政局添煩添亂嘅局面，而香港嘅選舉，包括埋區議會選舉，又真係影響埋特首嘅選舉，「如果阿爺係有意一下子解決香港選舉帶來嘅隱藏問題，咁檢討特首選舉亦必然係其中一環，仲係最重要一環。」

　　佢估計，CY嘅論點，牌面上未必真係針對林鄭而發，但林鄭嘅講法，直接否定CY，好明顯就係「心有不甘」呢位前特首喺特首選舉問題上面指指點點，「可能林鄭覺得，如果真係協商選特首的話，CY對人選嘅影響力肯定比林鄭嘅大，所以林鄭先咁樣回應。但實際上，阿爺有咩想法同決定，依家真係言之尚早，林鄭咁快就講死，的確係幾不智，亦會成為佢政敵攻擊佢嘅藉口。」無論如何，特首新一輪「跑馬仔」遊戲，已經正式宣告開始。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇