選委會界別仍未有推薦名單

　　星期日(19日)就是最新一屆立法會換屆選舉，一如之前所料，雖然有候選人已經打起「告急」牌，但候選人幾乎清一色的情況之下，選情絕對談不上緊張，特別係直選20席，Tina問過一啲過往都有關心過選舉的朋友，佢地直頭連自己區係屬於新選區嘅邊區，都已經無去深究，更遑論候選人係邊個。

　　直選可能唔多緊張，但Tina聽聞功能組別同埋選舉委員會界別選情仍然係非常激烈。部分功能組別席位，未到最後一刻都未知鹿死誰手，就算係現任議員都未能確認自己係跑得出定係陪跑，所以有政界中人估計，功能組別會有唔少陰溝翻船嘅機會。

　　至於選委會議席，唔少人都相信，1400幾人要喺51名候選人之中揀40個其實好容易，甚至係好早都已經預計到邊個會當選。但原來今時今日仲有四日就選舉，呢一刻都未有所謂嘅「推薦名單」。Tina聽聞，51名候選人將會係星期五齊集會展進行一場「大亮相」，向全體選委進行最後嘅拜求票活動，絕對係「完善選舉制度」訂立以來最搶眼球嘅一次活動。

（iStock）

　　有選委同Tina講，至今都未有推薦名單，估計係有關方面有意留到最後，令到所有落場嘅候選人都戰戰競競，等大家都盡全力打贏今次選戰。而觀乎過去咁多場政綱宣講會，部分擺明經驗較淺嘅候選人，都係非常落力「跑場」，縱使每次同選委見面都係得兩三分鐘時間介紹自己嘅參政理念，但佢地每次都做足功課備戰。呢位選委相信，最終「推薦名單」肯定會出，至於名單上會有幾多人名，佢就希望愈少愈好，等佢地有多啲選擇。

　　講返今次選委會界別安排，原來有效選票係一定要填足40個人，多一個少一個都唔得，所以會有一部特別嘅機先行畀選民確認選票係唔係填得正確。呢位選委相信，到投票當日可能會出現唔少混亂場面，包括較年長嘅選委可能填來填去都填錯，佢仲講笑話：「完善咗個選舉制度姐，無話完善埋個選舉過程，以選舉事務處過往甩轆嘅往績，怕且都有排去總結經驗先做到最完善喇！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇