4億8千萬粒肉丸的Marketing

　　不論人在職場，定係人在市場，要贏人，先要懂得Market自己。無論你做邊行，其實你已經係Marketing嘅一份子。「我做Marketing」每週同大家分享Marketing同職場求生術，一齊分析Marketing生態，笑談職場「變態」～

 

　　要講Marketing生態，我哋做呢一行嘅人最常遇到嘅事就係，朋友約你出嚟食飯傾生意大計，然後用一餐McDonald's去換走你嘅Marketing絕橋。日前出席朋友飯局，有個老細級嘅朋友近來不停地向多方面創業，本身做設計嘅佢希望將自己嘅業務「拓展」至飲食業，所以半年前喺大陸一間商場內開咗間小食店，將自己「冇乜特別」嘅港式雞旦仔打入國內市場。佢理念好簡單，仿效 IKEA咁開小食店，開條新血路。但佢呢啲「我有我自由，唔理客感受」嘅諗法，大家都估到佢「冇乜特別」嘅生意只有一樣嘢特別，就係特別快玩完~ 問我有冇計仔起死回生。

 

　　其實不論你公司係賣石油定賣蠔油，都會有「賺唔夠」/「賺少咗」嘅一日，原因唔係公司Product出咗亂子，問題係Product嘅Life Cycle到咗極限，Marketing嘅策略同Business Model 亦走唔出既定嘅框框，賣衫嘅最終都係賣緊衫，隻Cash Cow都只會局限係件「衫」度。而九成嘅Marketer第一個反應，只會諗推出新設計嘅衫款或者引入新設計師嘅產品。而有部分Marketer就會好似我朋友咁「求變」，開拓新市場。

 

　　「要變，其實唔難？」，其實好難～成功例子大家可能成日聽，而有好多國際知名嘅品牌公司已經開始咗好一段時間，香港亦唔難遇見，最常見嘅生意延伸就係做餐飲，當然唔係話事事旦旦開間餐廳就係「延伸」，要成功咁變一定要有原因同目的，而呢方便IKEA可以話係佼佼者。佢早係1960年就推出第一間IKEA餐廳，當年開餐廳嘅原因好簡單，創辦人Ingvar Kamprad明白IKEA店舖嘅Size本身都唔細，而Shopping嘅人好多時會因為行得耐好累、或者太肚餓而提早走人，佢哋當年開餐廳就係為咗留住呢班人嘅同時，亦為顧客提供咗一個聚腳地。

 

 

　　開餐廳嘅公司其實有好多，Skincare嘅代表有 L'Occitane Café，Lifestyle Retail代表有Café&Meal MUJI，賣鞋嘅代表有TOMS Coffee，Fashion界亦有agnès b cafe，而agnès b 仲有賣花同朱古力。不同公司「踩過界」嘅原因都唔一樣，有小部分公司嘅目的係為咗將自己嘅產品加入餐廳內進行Cross Sell，不過老老實實，咁做其實對本身產品嘅營業額幫助不大，因為好少人會因為你啲肉丸好食，而走去買你張餐枱。而有啲公司嘅目的就係希望開條新血路，嚟一個藍海策略。

 

　　以IKEA為例，佢係1987年到2011年間，大約賣出116億粒肉丸同12億件熱狗，平均一年約賣4.8億粒肉丸同5000萬件熱狗，而餐廳每年平均為佢哋帶嚟約131億港幣嘅收入，經已勁過好多餐廳嘅營業額～

 

　　其實大部分公司開設餐廳重點原因一定係為咗「品牌」，係賣緊佢哋嘅「態度」，賣產品先係其次。你可能唔一定要買家俬，你亦未必一定會用護膚品，但你一定唔可以唔食飯，而最好嘅方法令顧客感受品牌嘅DNA，必定係將其融入飲食嘅過程中，用食物去「品味」公司，令顧客體驗你公司嘅理念。

 

　　而最煞食嘅係，用「味道」同「氣味」去加深印象，有時遠比「視覺」更為厲害。一般情況購物大部分嘅時間係「視覺」上嘅感受，而當顧客離開店舖之後，顧客亦可以用相片去回味視覺上嘅記憶。但味道同氣味作Marketing就唔同，你要回味就一定要親身返去店舖度感受同幫襯，不知不覺你就會被呢種虛無飄渺感覺吸引住，所以你成日見IKEA咁多人排隊買熱狗，其實係有原因的。

 

　　公司去到某個階段要變，人工作到某個階段都一樣要變。不論公司定打工仔，要變就要變得有技巧，將自己嘅強項無限伸延，將來先有機會擁有「4.8億粒肉丸」嘅成功。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票