「黑暗貨幣」比特幣？升幅咁勁究竟有乜原因？

　　2009年發行嘅比特幣近期又再次成為焦點，由2017年年頭一粒比特幣約值一千美元，因為年中發生WannaCry 勒索病毒事件後，比特幣再次受人關注，炒升到今日已經升到約五千幾至六千美元左右一粒。年頭到而家升幅約五倍有多，投資回報遠勝好多投資工具。

　　記得2010年時，一單較為人知嘅新聞，美國一位程式員喺一個比特幣平台「Bitcoin Talk」 提出，如果有人肯幫佢買薄餅的話，佢就願意出一萬粒比特幣作交易，後來有位英國人二話不說就幫佢order咗兩個薄餅，而呢個就係比特幣史上第一個真實交易，亦係大家聽到嘅「Bitcoin Pizza Day」。當年一粒比特幣只值USD0.08 ，如果呢位人兄今日仲補留住果一萬粒比特幣的話，今日價值已經升到五、六千萬美元，而家佢已經係億萬富豪。唔單只外國，香港都有比特幣嘅交易，去年亦有私人音樂教師願意收比特幣作學費。

　　雖然係咁，今日大眾對比特幣嘅睇法仍然係好兩極，信嘅朋友就繼續全情投入，唔信嘅朋友就覺得呢個係世紀騙局，買定花生等睇戲。呢類咁爭議性嘅話題唔方便喺呢度討論，但我哋做marketing嘅，經常會先以理情嘅角度去分析每一件事，而最理情嘅東西必定係數字。佢係數字上嘅升幅係無可否認嘅事實，而比特幣亦愈來愈受大眾、公司、「團體」所重視，由最初人稱「黑暗貨幣」，只係專門俾「團體」使用嘅交易工具，到今日已經有人用比特幣交學費。而家亦開始出現咗其他比特幣交易軟件／硬件工具，例如比特幣銀包、比特幣交易市場等等，甚至有用比特幣收錢嘅自動售賣機出現，可見大眾開始慢慢接受比特幣。

　　幾年間有咁大轉變，你第一件事會好想了解比特幣價值嘅起源。其中一個原因係因為比特幣「貨幣」嘅特性，嚴格嚟講佢唔係貨幣，佢係介乎於貨幣與產品之間。唔似一般貨幣，佢並非由國家或銀行發行，亦唔受銀行體系監管，所以暫時無人能夠凍結其他人嘅比特幣或者其戶口，可以話係一種「無色認」嘅貨幣／產品，方便咗大家去轉移資產，所以先有「黑暗貨幣」嘅稱號，而呢個就係比特幣其中一個功能上嘅價值。

　　之後其認受性不斷增強，當中必然夾雜著自然因素同人為因素。簡單說就好似以前石器時代，原始人用石輪作貨幣（石幣），只要出現第一、第二單石幣交易，認受性就會慢慢地建立起來。只要愈來愈多人知道石幣交易成功，慢慢就會有人跟隨，認受性亦因而不斷增強。可惜嘅係，因為有一次有原始人誤將石幣跌咗落河，之後攞唔返上岸，自此石幣就慢慢失去其價值。所以不論係比特幣也好，一塊石頭也好，就算佢本身係無功能價值，只要認受性超強，食鹽都可以炒高十幾倍，亦可當作交易貨幣之用。 

　　文章並唔係鼓勵或唔鼓勵人哋去投資／使用比特幣，對比特幣仍然抱持平態度，因為暫時都未能簡單地為比特幣定位。不過可以肯定嘅係，比特幣係一種投資工具，而稱得上投資工具就一定有其風險，而財富增值，就係風險管理嘅藝術。識得玩就叫「藝術」，唔識玩就叫「返魂無術」。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇