【買衫都有AR體驗？】挑戰網上店！與時裝公仔大玩換衣遊戲

　　你上一次喺實體店買衫係幾時？咁你上一次喺網上買衫又係幾時？我身邊大部分女性朋友、女同事，雖然都仲有行街買衫嘅習慣，但次數同金額已經大不如前。相反，上網買衫已經成為佢哋生活中不可或缺嘅一部分：搭緊車可以買、臨瞓前可以買，而且仲可以喺公司收貨，如果唔得閒，又可以揀儲物櫃攞貨。面對網上商店，傳統以實體店作銷售嘅品牌又可以點應對？

　　當然，最直接嘅方法就係迎合潮流，推出網上店，嘗試為自己開拓多一條銷售渠道。Fast fashion龍頭品牌Zara喺2010年開始經營網上店，但據報直至現在，佢嘅網上銷售只佔銷售總額百分之六，所以佢哋絕大部分嘅收入，仍然來自實體店。該品牌上年盈利增長放緩，只有百分之七增幅，所以不得不想辦法提升客戶店內體驗，從而拉高銷售。

　　Zara其中一個試行計劃，就係將會喺舖面引入AR技術（擴增實景），為時裝公仔不斷「換新裝」。一般時裝店內都有幾個或幾十個時裝公仔，每星期或每隔幾日換上推廣服飾，單方面向客人作展示，並沒有與客人互動。Zara而家就畀客人透過app揀選心儀或考慮緊嘅服飾，然後透過屏幕，以AR技術讓時裝公仔「穿上」，示範服飾效果。Zara計劃喺120家門市率先推出以上體驗。

　　Zara帶畀客人嘅新服務成效如何，則有待觀察，不過各大品牌就不得不繼續尋求突破，以面對e-commerce嘅大趨勢。其中一個方向，就係提供一啲網上購物不能比擬嘅體驗或服務。

　　行街買衫其實並不止於將一件貨品帶返屋企，而係一整套嘅購物體驗：放工前約定兩三個姊妹喺地鐵站等，然後穿梭商場發掘新店，再感受每一間店舖嘅佈局擺設，同sales交流互動，等佢介紹產品特色，最後先排隊試身同畀錢。如果品牌計算得宜，店舖四周營造出嚟嘅shopping氛圍仲會令客人購物慾增加，不知不覺消費得更多。當你消費得愈多、時間愈長，亦會帶動周邊餐飲及快速消費品銷售。

　　有說網上購物主要針對較年輕一代，而年紀較長的則仍然喜歡於店舖購物。其實如果能夠提供有質素的用戶體驗，無論線上線下，買衫對女士嚟講都應該一樣吸引。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票