【職場求生術】別淪為職場透明人！不如為自己刷「存在感」

　　認識一位舊同事叫阿偉。每次對住佢，我都有一種莫名奇妙嘅距離感，就好似同佢之間有一層隔膜。

 

　　我同阿偉喺公司嘅對話其實唔算少，但如果你問我有無一啲較深刻嘅對話，嗯…我諗唔到。阿偉嘅工作表現不過不失，但如果你問我佢有無咩代表作，或者重大過失，我都係諗唔到。如果你要我搵一個形容詞去形容阿偉，同樣地，我都諗唔到，因為阿偉真係無咩特別優點（或者缺點），亦無一刻能夠令我對佢留下印象。

 

　　我會稱呢種存在感極低嘅人 — 「職場隱形人」。

 

　　呢種人扮演著一個可有可無嘅角色：一個食lunch時，大部分人都唔記得叫佢嘅角色、一個請咗兩日sick leave都無人會發覺嘅角色。

 

　　以下嘗試分析呢種角色嘅心態：

 

　　第一，呢種人可能非常保護自己，或換個角度講，佢哋非常不信任其他人，從而拒絕開放自己，永遠唔會輕易透露自己嘅感受。每當上司同事同佢哋傾偈時，話題往往只停留於表面（例如「weekend做咗啲咩呀」、「lunch食咗啲咩呀」等）。而佢哋亦多數係話題終結者，喺辦公室內難有知心友。

 

　　第二，「職場透明人」多數缺乏向上流動嘅野心，導致喺辦公室缺乏投入感。同上司同事打好關係可以幫助自己工作更順暢，亦係大部分公司升職嘅考慮因素之一（至少你要懂得證明你嘅工作及溝通能力）。一個同事自願跌入「透明人」行列而不作掙扎，可見佢並無諗過同其他人（以及同昨天嘅自己）競爭。佢哋最理想嘅生活好可能係每日靜悄悄的來，靜悄悄的走。

 

　　第三，缺乏自信。尤其初踏入職場嘅人都唔太敢於表達自己嘅意見，慢慢，「龜縮」就變成一種習慣，一種「慣性惰性」：開會揀最後一排位置坐、Q&A時就扮抄筆記、食team lunch時就揀遠離上司老細嘅位置、覆email時就只會詢問上司指示，而唔會主動提出建議等等。

 

　　職場上嘅自信係一點一滴咁累積返嚟，經過挫敗、批評而令自己變得更強。害怕犯錯而逃避表達意見只會將自己嘅位置愈推愈後，由「透明人」漸漸變成「無用人」。

 

　　職場上遇到嘅人千奇百趣，有義氣、有衝動、有承擔、有縮骨、有細心、有膽小，當然亦有PK，就算古古怪怪，都起碼喺別人心目中留下一個印象。

 

　　如果你自覺喺公司處於一個「半透明」嘅尷尬狀態，而你又想作出改變，不妨先從發展一項獨有技能開始，例如成為PowerPoint、Excel能手，喺別人心目中留有位置。

 

　　如果暫時未有工作上嘅突出技能，咁「識食」、成為lunch time搵餐廳嘅能手亦可以係一條暫時嘅出路（其實好多人已經行緊呢條路線，仲諗住長期咁行落去）。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情