【打逆境波】生命不退讓：藉口是毒藥，意志才是武器！

　　每個人都會遇上逆境，逆境初段你會覺得好辛苦，但仍會努力。當努力後未見成果，就會有放棄嘅念頭，最後變成「兩頭唔到岸」嘅局面。其實處於逆境時，只要你一對生活作出退讓，逆境過後，「生活」就會慢慢變成「生存」。

　　細個嘅時候，因為家境窮困嘅關係，一家人住喺一間30至40呎嘅板間房一段時間。除衫褲鞋襪外，屋企主要家具只得一張碌架床、一張摺櫈同一部手掌型嘅收音機。每星期最期待嘅事，就係逢星期五晚可以買一條2.5蚊嘅雪條，已經好心滿意足。當年最艱苦嘅時候媽媽經常會講「生活難捱唔緊要，最緊要人有我冇事，有手有腳，乜嘢都有機會改變」。當陣時仲係細個，捱咗一段長時間都冇乜改變，所以唔太明白呢一番話。但後來發現，面對逆境重點唔在於最後嘅結果，而係中間面對嘅過程，要保持對生命唔退讓嘅心態，唔好將其變成習慣。

　　朋友阿俊，由於讀書唔多，工作能力亦唔高，所以工作十多年都係「高不成，低不就」。當所有朋友工作十多年已經升職數次，而佢雖然轉過幾次工，但職級仍然係初級文員。每次朋友聚會談及大家未來發展時，佢都會愁眉苦臉講「年紀愈大，做乜都提唔起勁，進修也好，轉行也好，而家做乜都已經太遲」，如是者每年都有同一番對話，而佢嘅逆境波就持續咗十多年。其實要改變，「現在」永遠係最好嘅時候，如果每一次都話「遲啲先」，下年嘅今日你又會再講「已經太遲」。

　　「進修完，咪又係冇得升職」、「食埋今餐先減肥啦」，其實每杯汽水、每塊多餘嘅肥膏，都係一種放棄。你可以因為某啲因素而退讓一次，但永不退讓第二次。第一次退讓係「微調」，但第二次退讓就係藉口，只要一開始咗呢個藉口，就會再有沒完沒了嘅藉口，亦會令自己嘅選擇隨著年紀而愈來愈少。對於大事情，去到非退不可時，將方向作出微調，愛情不如意時專注工作，因疫情而失業時專注進修、裝備自己，為下一個階段作準備。

　　改變，一定唔會突然之間發生，亦唔好祈求乜都唔做自然就會有改變。每個人都有自己嘅困難，有人會將其放大、放到最前當藉口，變成你前行嘅障外物；但亦有人會將其收細、消化，放到後面變成推動力。逆境，先能令大家見真章。

　　有作家寫下一句發人深醒嘅說話「永遠令人停下來，唔係『絕望』，而係『放棄』；令人繼續前進，唔係『希望』，而係『意志』」。每場逆境波都有完嘅一日，疫情最終亦會完結。

　　記緊，藉口係你嘅毒藥，意志先係你嘅武器。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇