【千奇百趣】激到嘔血！細數5個實習生最奇葩行為

　　每年一到暑假，唔少公司都會請學生哥做實習生，諗住可以幫輕下同事workload之餘，亦可以趁早吸納有潛質嘅未來員工，點知最近網上瘋傳一張相片，指有實習生將未拆包裝嘅A4紙放入影印機，有網民留言「真係會激到嘔血」……究竟呢個世界上，仲有幾多奇葩實習生？

 

（網上圖片）

 

1. 返工第一日即請假去旅行

 

　　其實成個暑假流流長，做實習可能都係做得嗰個零兩個月，真係有必要喺嗰段時間去旅行咩？何況返工第一日，連環境都未睇清楚，同事都未認得晒，就話自己「一早買咗機票，所以一定要放假」，呢個絕對係有冇責任感嘅問題！

 

2. 日日Fashion show

 

　　返工著靚啲、留個良好印象畀同事／客人係人之常情，但如果一個實習生日日著到花枝招展咁返公司「行catwalk」（尤其佢只係需要喺公司幫手做下文書處理而唔需要見客嘅話），似乎over咗！

 

3. 將咖啡豆連包裝放入咖啡機

 

　　有僱主試過叫實習生幫手沖杯即磨咖啡畀客人飲，點知等咗十幾分鐘都未見人影，後來先發現個位實習生原來唔識用咖啡機，仲將咖啡豆連包裝放入咖啡機入面，結果搞到部咖啡機都壞埋！（小編即刻諗起另一個「都市傳說」──今時今日嘅細路以為煮公仔麵係要將成包公仔麵掉落水煮！）

 

4. Fax文件嘅時候，以為要成張紙即時被fax走先算成功

 

　　雖然而家嘅科技好發達，不過要讓一件東西喺自己面前即時被傳送去另一個空間，應該都仲係無可能！（抑或嗰位實習生學識咗悟空嘅瞬間轉移術？）

 

（《七龍珠》劇照）

 

5. 帶男／女朋友返工

 

　　今時今日，帶父母返工原來已經唔算稀奇，最稀奇係有人竟然會帶男／女朋友返工。網上流傳話，有間公關公司請咗幾個實習生，咁啱公司舉行活動，就要求其中一個實習生去現場幫手，點知嗰個實習生帶埋男朋友一齊去不特止，活動尾聲嘅時候更冇埋影，連一句交代說話都冇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動