良幣驅逐劣幣

　　退休後，大量空間時間，可以嘗試以前未做過的有趣事。好友前資深記者張艾渟，創意多多，拉我話：「碌sir，你做咗幾十年電台，突然退休，一定好多聽迷有點失落。不如開個『粉絲頁』（fanpage），同佢哋保持接觸吖。」

　

　　「騎騎騎，好呀，你做啦，我唔識噃！」

　

　　就咁，前年11月，「Luke Sir曾智華」正式面世。乜都講吓，飲飲食食、生活情趣、政治時事分析。

　

　　咦，發覺，一講政治時事，唔掂，即有大量「粗口族」湧現。於是拉一位網絡專家P仔問：「P仔，有乜法子鏟走晒班粗口人及五毛打手？」

 

網上有無盡收錢「做嘢」的無聊五毛，必須見一個鎖一個，絕不手軟。

 

　　「碌sir，唔准講粗口？你個page即刻冇咗七成followers喎。邊有網頁講政治唔講粗口㗎？」

 

講時事政治而不准粗口會蒸發一半粉絲？事實證明是錯的！

 

　　我唔信！於是，去年中開始，非常積極「鎖戶」及刪除粗鄙、壞品味、不講理及核突五毛打手（唔好問我點知！）戶口及留言。

　

　　鎖吓鎖吓，哈，邊個話唔掂？結果，原來一個相對「理性及清潔」網頁，是可以出現的！因有「人以群分，物以類聚」效應。掃走班躁狂粗口族後，有教養，有品味，接近我價值觀（講理、正義、自由、民主、法治）的粉絲，會愈來愈多。

 

將粗口族、壞品味、不講理、劣文化及五毛族等「劣幣」全鎖戶，「良幣」自會慢慢湧現。

 

　　我從不邀請任何人「讚賞」網頁，只重質不重量。結果，年多下來，慢慢有機積聚（Organic growth）日日追蹤擁躉，已破五萬大關。

 

這個Fan Page 從沒邀請讚好，只會鎖走不同路者，以營造「物以類聚人以群分」效應。憑有機生長（Organic Growth)，年多已經超過五萬優質擁躉。

 

　　至此，我極好奇想知，究竟呢五萬粉絲，係乜人呢？於是，請專家做研究。發現：

　

　　一、遠比我想像中年青。本以為退休人士應只吸到退休者follow。原來錯！七成擁躉集中在25至55歲。當中，35至44歲佔三成多！女性粉絲有五成半。

　

　　二、教育水平相當高。超過七成半為大學畢業或研究院畢業者。

 

良幣驅逐劣幣效果明顯，近八成粉絲擁有大學或以上學歷。

 

　　三、伴侶關係。七成已婚，一成有穩定關係。兩成獨身。

　

　　四、喜歡的人物及機構。張達明、張堅庭、潘焯鴻、何桂藍、葉一知、曾志豪、呂秉權、譚蕙芸、畢明、李怡、顏純鈎、林夕、香港記者協會、香港中文監察、香港電台工會。

 

調查顯示，我的粉絲不少與香港電台及經濟日報集團重叠。

 

　　五、喜歡的電視節目。議事論事、頭條新聞、鏗鏘集及有種責任叫堅持（書本）。

　

　　現代科技真厲害，根本不用做甚麼調查，只要你在手機一按入我的fanpage，立即，你的一切背景，已呈現。真是「得數據，得天下」！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇