《Make Money》加息週期憧憬下，應該買乜最增值？

　　美國聯儲局早前轉風，美國可能提前至2023年加息兩次，個大市好似開始預先炒加息概念咁款，作為投資新手，究竟係加息週期下，應該買邊類股票或者投資產品呢？今集MakeMoney就同大家預先解構下，點樣係加息周期下令到自己個小錢罌繼續增長！

 

 

（Shutterstock圖片）

 

加息週期梗係買美匯，港匯一樣會強勢！

 

 

（Shutterstock圖片）

 

　　加息週期其實係講緊由美國聯儲公開市場委員會作為領頭羊角色，將聯邦基金利率提升；假如其他國家唔跟升的話就會造成「息差」，間接令到自己國家資金流出，從而推高通脹，所以如果美國開展加息週期的話，其他主要貨幣好似英鎊、歐羅、澳元等，都跟住調高，因此每一次聯儲局加息減息，都會對環球大市有重要影響性。

 

　　最直接想法，減息週期下，匯市資金通常都會流入日圓為主，因為概念上日圓長期負利率，日圓匯價跌無可跌，所以可以被視為安全避險產品；不過近十年來人民幣係國際市場嘅影響力越來越強，因此人民幣都成為其中一個重要避風港。而係加息週期，最直接就梗係買返美元最實際啦！以6月計，美元指數升近3%而港元由於同美元掛鈎，所以港元以及用港元計價產品（例如港股）都將會受惠！

 

銀行股最得戚，地產股依然無懼，公用股難有好表現

 

 

（Shutterstock圖片）

 

　　而港股方面，乜板塊最受惠呢？同銀紙有關嘅銀行股一定係其中之一啦！因為銀行主要收入係來自利息，利率升高就可以提升自己嘅借貸利率，從而提高收入。好似美國係2004年開展加息週期，當年匯控（00005）股價一整年升近9％，恒生銀行（00011）升近6%，渣打銀行（02888）更逾升14%！所以而家開始留意定就差不多啦！

 

　　另一方面，理論上加息會令到地產股受壓，因為買樓大部分人都需要做按揭，而加息則令到按揭成本上升，從而影響投資者入市抑鬱；不過換個角度，又有人認為，就算聯儲加息都好，息口成本依然好低，加上本港樓市需求熾熱，地產事業依然無畏無懼！所以地產股都依然照升可也。

 

　　不過，就難為公用股啦，因為公用股派息比率經常同美國十年期債息作比較，係加息週期下，資金會從債市流出，債價會下跌而債息會上升，如果想以收息為主嘅投資者，就會將資金投入債市而放棄公用股，例如中華煤氣（00003）、中電（00002）呢類股份，就要睇路啦！

 

四大行業曾跑出，投資者的另外選擇

 

 

（Shutterstock圖片）

 

　　除咗銀行、地產、公用股之外，其實係咪無其他選擇呢？咁又唔一定嘅，根據大行花旗係今年3月時候做過嘅一份研究報告指出，參考過去三次嘅加息週期，包括1999年、2004年及2015年，跑贏大市嘅四大行業分別係原材料、能源、資訊科技及金融業，主要由於價格上升、負債比率低及淨息差擴大有關。

 

　　此外，加息背後目的係想壓制經濟過熱以及通脹問題，所以同通脹掛鈎嘅投資產品亦相當合適，好似呢次香港政府發行2021年嘅iBond債券，係保底2厘派息，如果通脹率高於2%仲可以收取更多息，所以係加息週期下，抗通脹產品都係另一個唔錯選擇！

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇