《MakeMoney》柴犬幣新玩法，Shibaswap可做「定存」？

　　加密貨幣圈呢半年熱話，肯定就係「狗幣」概念，當中狗狗幣（Dogecoin）好似比較多人講，主要因為係由特斯拉創辦人馬斯克經常係自己推特「加持」；而柴犬幣（Shiba Inu Coin）似乎比較少人講，甚至有人高位接貨後大跌，慘被網民稱「屎幣」、「老千」等。不過，其實柴犬幣近期推出轉換平台「Shibaswap」，除咗提供貨幣轉換之外，仲提供類似「定存」收息嘅投資，今集MakeMoney就同大家簡單介紹下玩法！

 

 

玩Shibaswap可獲「Leash」幣及「Bone」幣

假如大家對柴犬幣唔認識或未夠信心，可以自行去官網睇睇白皮書，了解背後「去中心化」理念

 

　　自Shibaswap推出之後，唔少資金都開始「質押」係呢個平台上，仲推高埋燃料費（GasFee），不過好彩近期以太幣已經進行倫敦「硬分叉」，令燃料費回落，間接推動以以太幣為基礎嘅虛擬貨幣，所以近期柴犬幣交投都開始多返。

 

　　早前入手柴犬幣嘅都係炒Shibaswap出台，而呢個平台係7月初推出之後，柴犬幣價格未見有大升升幅，不過大家就發現平台可以做類似「定期存款」嘅玩法，而所得嘅回報分別就係「Leash」幣及「Bone」幣。

 

　　據白皮書所講，Leash原本作用係同狗狗幣價格掛勾，但而家已經取消呢個功能，只係一種單純ERC20 Token，而Leash供應量僅107647個，用作對應Shib龐大供應量；而Bone就係你質押Shib之後，所獲得嘅獎勵，而Bone係治理型代幣，只有持有越多Bone，可以改變協議嘅能力就越高，有啲似公司控股權。

 

提供單幣或雙幣質押需付燃料費

 

近期Shibaswap交投頻繁，令到燃料費（GAS Fee）提升，不過自從倫敦「硬分叉」之後，燃料費已經開始回落

 

　　係Shibaswap上，投資者可以進行單幣質押（Bury）或者雙幣質押（Dig），單幣質押其實就同做「定期」差唔多，最快捷做法，就係將你手上嘅以太幣（ETH）拎去Shibaswap上換取Shib、Leash、Bone，而唔同幣嘅質押，回報率都會唔同，而回報率會隨住總質押幣數嘅多少而跳動。提醒返大家，由你嘅虛擬錢包過落平台質押，係會收取ETH嘅燃料費，大家係轉換貨幣或者過錢包，記得留返小小燃料係入面啦！

 

雙幣質押高成本但高回報

 

　　而雙幣質押（Dig）嘅回報率更高！因為你需要提供兩種貨幣嘅流動性，例如BONE/ETH、LEASH/BONE、ETH/USDT。概念上，你提供一種貨幣流動性畀Shibaswap，假如貨幣價格上跌，都會出現折損；而雙幣提供就避免呢個問題，而雙幣質押相對地成本都高咗，回報率自然會大！

 

平台買幣留意錢包所接納合約

 

筆者就犯新手錯誤，提提大家轉錢包時候記得留意返係接受咩合約模式，避免嚇餐死啦！

 

　　筆者係平台推出之前，已經係幣安持有柴犬幣，原本想將幣安嘅錢包放落自己係Coinbase嘅虛擬貨幣，並且選擇Gas Fee較平嘅BEP2協議（幣安鏈主網協議），後來發現Coinbase並唔接受BEP2合約，只接收ERC20（以太坊主網協議），本以為自己過億粒柴犬幣石沉大海，永遠返唔到轉頭。

 

　　後來積極爬文，先發現狐狸仔錢包（Metamask）係同時支援BEP2及ERC20，只要將自己Coinbase申請錢包嘅12個Key入返落狐狸仔錢包，就會顯示到自己石沉大海嘅柴犬幣原來仲係到！作為初初接觸虛擬貨幣嘅新手，要留意平台同錢包之間嘅合約接受模式，唔好眼見交易費平貴而忽略呢個重點，希望呢個小知識幫到大家！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動