《經濟不停學》原罪產業食正人性剛需，愈墮落愈快樂！

　　上次同大家講過ESG投資，講晒理念、環保又盛，好似好高尚咁。但亦都有人中意反其道而行，專門投資賭博、煙、酒、軍火同色情等嘅原罪產業（Sin Investment），貪佢哋可以滿足人類嘅原始慾望，剛性需求高，愈墮落愈快樂呀。

 

　　就港股而言，主力做原罪產業嘅公司唔算多，一堆澳門賭股、白酒同啤酒股已經佔咗絕大部分，最多都係加埋幾隻軍工股，仲有中煙香港（06055）同思摩爾國際（06969）兩隻同尼古丁相關嘅股份，至於色情呢 ……就真係唔多覺。

 

　　喺美國，有專門追蹤原罪產業嘅邪惡指數ISE SINdex Index。呢個指數係由標準普爾公司編制，專門追蹤賭博同煙酒相關產業嘅表現，唔包軍火同色情產業。表現都唔錯㗎，今年以嚟累升近三成，跑贏道指嘅約15％升幅。

 

　　呢啲產業嘅服務／產品好多時會令人成癮，而且品牌忠誠度高，例如飲酒飲開邊隻牌子、每日要食固定數量嘅煙、賭客中意幫襯番旺自己嘅賭場，需求算係相當平穩。另外，好多原罪產業經營者需要拎到政府嘅特許權先可以做生意，所以容易做成競爭者數目少、議價能力高嘅局面。

 

成也政策敗也政策

 

 銀娛至今仍未能收復修訂博彩法消息公布後的跌幅。（HV2截圖）

 

　　不過，投資原罪產業嘅最大風險都係源自政策。好似澳門政府之前話要修訂博彩法，話賭牌年期太長，想取消副牌制度，增設非法接受現金或其他款項嘅存放罪。如果真係修法，賭企只可以硬食，嚇到啲賭股即刻急插。呢兩年嘅疫情中，香港、南非、英國等地都推出過禁止酒吧營業、唔畀餐廳賣酒嘅禁酒令，酒業股喺當時嘅環境中理所當然唔會好得去邊。

 

　　亦有政府會向買家或使用者徵收罪惡稅，希望減少市民消費行為。2013年菲律賓政府通過《罪惡稅法案》，將煙草製品嘅稅率增加高達8﹒2倍，其中大部分稅收投入番喺醫療衛生領域。德國喺2002年將賣淫全面合法化，喺酒吧、會所同妓院做嘅性工作者要交稅，2011年更喺合法賣淫嘅紅區內設置多部自動售票機，規定必須喺現場工作嘅性工作者在每日接客前買6歐元嘅含稅即日許可證先可以開工。

 

　　另外，講得做原罪，好自然就會出現「道德問題」，貪婪（賭博）、怠惰（煙、酒），憤怒（軍火）、色慾（色情），呢啲產業畀人嘅觀感唔好，令好多投資者唔會放錢入去，至少會將ESG納入投資考量嘅人唔會有動機去投資，亦有啲人甚至會考慮埋宗教同政治問題，呢啲人愈嚟愈多。缺乏資金，行業好難擴張。

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動