噚日打咗成日修改議事規則嘅仗，立法會終於可以停一停，下周再續。Jenny都有得抖一抖，回一回氣，就等小妹碌吓Facebook先！點知Jenny碌碌吓，竟然睇到環境局其中一個吉祥物「大嘥鬼」嘅「真身」！

　　平時大嘥鬼都係以虛擬形式同粉絲見面，喺圖片入面同大家講吓環保小貼士、緊貼時事熱話嚟抽個靚水咁，Jenny都好鐘意追佢啲Post㗎！仲會成日同朋友開心Share添！點知睇返呢兩日嘅Post，小妹就覺得大嘥鬼有啲唔同咗，細睇之下發現，原來今次張圖唔係整出嚟，而係大嘥鬼真係穿越次元嚟到現實喇！

就係呢個大嘥鬼模型！唔少粉絲同Jenny一樣都想擁有一隻呀！

　　大嘥鬼都聽到一眾粉絲嘅呼喚，喺留言度送出自己……嘅一張自製圖連同製作方法畀大家，等粉絲們都可以擁有一隻私家紙版大嘥鬼！不過相信唔少粉絲同Jenny一樣，想要隻立體大嘥鬼多啲囉！最好就有埋鎖匙扣，咁就可以日日提住自己「咪大嘥」啦！

大家睇吓，仲有大嘥鬼嘅嘜頭貼紙㗎！

　　今日大嘥鬼又有出Post喇！原來大嘥鬼見天氣轉涼，提大家飲多啲暖水，仲要記得用玻璃杯「暖埋手仔」添！So Sweet！不過Jenny個重點就落咗係杯水隔離嘅疑似「生果牌」電腦上面，嗰隻大嘥鬼模型同埋嘜頭貼紙！大家都知「生果牌」電腦背後嘅logo有啲係有得著燈嘅，Jenny就FF（幻想）緊，如果好似圖中咁，將大嘥鬼個嘜頭貼喺個logo到，跟手著埋燈，就真係望到都暖呀！相信大家仲會諗起星星局長添！