有咩比Monday Blue更令人Blue？就係星期一朝早話你知，你將會加班加足四日，仲要冇埋Happy Friday！講緊嘅就係一班立法會議員嚟緊星期四至六、仲有下個星期一都要加班開會囉！ 即使唔係當事人，聽到都不禁倒抽一口涼氣。而Jenny咁盡責，為咗緊貼議會大小事，當然只好跟埋一齊OT。

立法會大會將會喺14、15、16同埋18號加會，日日都係朝9晚8！（資料圖片）

來自主席的「希望」

　　話說上個星期三立法會開大會嘅時候，都仲未開始傾修改《議事規則》，主席梁君彥就已經叫秘書處出信諮詢議員，喺今個月嘅15、16同18日可唔可以加開會議，仲話夠法定人數就加得。主席嗰時就話，聖誕節前表決唔係「死線」，只係佢自己嘅「希望」啫！不過Jenny一直都Feel到主席呢個「希望」都幾咁強硬同強烈。

OT 4 Day日日都係朝9晚8

　　果不期然，放完個Weekend返嚟，秘書處就通知話，已經有39位議員同意加會，所以將會喺14、15、16同埋18號加會，日日都係朝9晚8添！其實建制喺議會入面有成40個位，法定人數都只係35人，成唔成事早就呼之欲出啦！所以涂謹申（阿涂）今日一知道消息，就大鬧而家嘅做法有如「霸王硬上弓」。

　　Jenny仲八到，18號個會仲要審議到完為止先可以收工！睇嚟建制派今次果然係開通頂都要同民主派死過噃！Jenny相信，經過呢一役，建制泛民兩派都話唔定更踴躍去爭取標準工時！

民記有冇得安樂開Party？

　　講時講，Jenny上個星期就收到民建聯（民記）嘅傳媒邀請，話聖誕將至，邀請記者們同民記議員一齊開Party，日期仲訂喺今個星期三嘅Lunch Time添！當時Jenny都好疑惑，星期三乜唔係正值大家打仗嘅時候咩？結果今日就收到話要加會嘅消息，仲講到明星期一要開到審議完為止，Jenny即刻明白晒！不過民主派都講到明會抗爭到底，民記同小妹能唔能夠安安樂樂咁開Party，都仲係未知之數！