每次新居屋一出，都有好多市民爭先恐後咁去樂富拎表，即使係有得上網Download都係咁話，所以話香港人嘅排隊文化睇嚟真係深入骨髓吖！

「折上折」沒有不抽的理由

　　嗱！今日新居屋「又」又嚟啦！點解係「又」又嚟？是咁的，因為特首林鄭上次趕喺上任一周年前出嘅「娥六招」，其中講明新居屋有得同市價脫勾，變相52折買樓，仲可以追溯到今年4月截止嘅嗰批居屋添！所以有唔少未申請過居屋嘅市民，今次都摩拳擦掌齊交表！

　　Jenny聽行家講，今朝房委個客務中心都未開門，已經有幾十人喺門外邊排隊等緊喇！無他嘅，Jenny都覺得今次嘅地段真心正，長沙灣有無敵大海景（幾年）、啟德有無敵校網、東涌雖然輸蝕啲，但勝在有露台（但唔可以BBQ），而且最平嘅單位118萬就有交易；加上政策嘅嘢五時花六時變，今次唔抽，下次可能又唔同咗樣㗎啦！唔蝕底嘅香港人梗係要衝衝衝！

下個月3日至16日交表

　　唔好話Jenny唔提大家，上次收到嘅申請表係繼續有效嘅，申請咗嘅朋友今次就唔好傻豬豬咁去再申請多次喇！而今輪申請就今日開始派表，下個月3日至16日先可以交表嘅！攪珠就預計會喺11月進行，祝大家好運啦！