《怒火》兩男神埋身廝殺 甄子丹讚謝霆鋒強如戰狼

　　【晴報專訊】「宇宙最強」甄子丹為動作片《怒火》擔任監製、動作指導及男主角，戲中與謝霆鋒打到飛起。子丹早前受訪時披露，要求霆鋒幻想自己是「戰狼」吳京。他笑笑口稱︰「如果佢超越到吳京就發達，今次佢接近吳京身手，絕對符合要求！」

 

 

　　已故電影導演陳木勝（Benny）執導及監製的《怒火》將於本月19日上映，該片在內地上映四日已狂吸逾兩億人民幣，反應甚佳。兩大男主角甄子丹與謝霆鋒在戲中展開一幕幕埋身肉搏，充滿地道港產動作片色彩。子丹不諱言為電影設計了不少高難度動作，打鬥風格就如兩大經典動作電影《衝鋒隊︰怒火街頭》和《殺破狼》，「陳木勝加甄子丹就會有呢種思路，赤手空拳，盡量將情緒推高！」

 

短棍短刀對戰顯身手

 

子丹刻意營造霆鋒「好打得」的形象，充滿官能刺激。(網上截圖)

 

　　子丹在《葉問3》曾對戰美國拳王泰臣，今次對手換上霆鋒，他直言自己有另類想法︰「霆鋒又靚仔又彈結他，我怕觀眾覺得我明蝦佢，特別鋪排佢好打得！」為了令對打場面更過癮，子丹要求霆鋒當自己是「戰狼」吳京︰「我設計咗一場好似《殺破狼》嘅動作場面，自己同霆鋒各以短棍同短刀對戰，我話如果佢輸咗都應該，觀眾覺得佢唔算太失禮已經贏，但（身手）過到吳京就發達，盡量做到接近佢嘅水平，最尾霆鋒絕對符合到，未拍完我已經話『你畢業啦』。」問及霆鋒能否接棒做動作巨星，子丹就稱︰「咁樣會太大壓力，今次佢絕對超班，比早年合作《龍虎門》嘅時候，各方面都有進步！」

 

霆鋒於戲中演大反派，表現亮眼。

 

　　《怒》片是陳木勝的遺作，子丹不諱言最難忘對方的笑容。「Benny係一位好好先生，影響香港動作電影，尤其佢執導過好多經典警匪片。」子丹回想90年代曾在亞視劇集《洪熙官》及《精武門》跟對方合作，料不到廿多年後才再有機會。他回想道︰「我哋原本再合作，打算去墨西哥拍一部講述警察大破毒梟嘅故事，但製作費太龐大就算數！」可惜的是，陳木勝在拍攝《怒火》期間突然感到身體不適，後來證實患有末期鼻咽癌，最終不敵癌魔離世。

 

陳木勝病逝影圈損失

 

子丹冀《怒火》可延續港產動作片的情懷。

 

　　子丹強調由劇本構思到拍攝現場，與陳木勝也有好好商討每個細節。他說︰「我哋喺《怒火》剪接期間都有交流，初時都唔知道佢出事（患癌），直到有一日佢打電話講『我瀨嘢』，當時好突然、好驚訝！」他透露為《怒火》埋尾時，陳木勝仍未知自己有事，拍畢後僅表示覺得疲倦，但沒時間檢查身體，豈料癌細胞已經擴散。子丹感觸道︰「佢抗病嘅態度好積極，人生最尾一段路相信全行都送上鼓勵同幫助，我都介紹咗一啲治療師畀佢，之後大家都無再騷擾佢。最後我睇報紙先知道佢離開咗，絕對係電影界嘅重大損失。」

 

轉載自: 晴報

• 

【etnet 30周年】多重慶祝活動一浪接一浪，好禮連環賞！ ► 即睇詳情