戴夢夢下月閃婚嫁金融才俊 舊愛太極Ricky︰唔去飲但做人情

　　【晴報專訊】戴夢夢去年與太極樂隊鼓手朱翰博（Ricky）結束五年情後，今年五月曾傳復合，不過夢夢昨日突然宣布跟圈外男友Kyle入紙註冊，下月結婚做幸福人妻。夢夢上載婚照放閃，她回覆本報時避談是否奉子成婚︰「佢（未婚夫）怕醜想低調啲。」夢夢舊愛Ricky則強調不會出席婚宴。

 

 

　　36歲的戴夢夢昨日在IG宣布婚訊︰「走在一起，是一種緣份。一起在走，是一種幸福。遇上了，珍惜彼此。We're getting married！」她昨日回應本報稱︰「我結婚喇，多謝晒你哋！」但她避談是否「雙喜臨門」：「因為我另一半唔係圈中人，佢怕醜想低調啲，多謝大家祝福。」準新郎Kyle從事金融業，夢夢大讚未婚夫體貼兼廚藝精湛，令她大飽口福。二人已入紙註冊，下月安排律師見證簽字結婚。

 

輕鬆抱起夢夢的Kyle靚仔有型，獲網民大讚貌似周嘉洛。

 

淋足兩個鐘影雨中婚照

 

夢夢與未婚夫Kyle齊齊遮風擋雨，寓意風雨同路。

 

　　日前夢夢與Kyle到郊外拍婚紗照，為營造浪漫雨景，攝影隊租了一部水車，夢夢與Kyle被淋得全身濕透，夢夢非常喜歡淋雨婚照︰「淋雨淋足兩個鐘，濕身有啲凍，係咁落大雨好似黑色暴雨咁，我一邊影一邊啲假雨水入晒口，飲咗好多。」她笑言雖然拍得辛苦，但效果勁靚︰「好有我哋風雨同路嘅感覺。」

 

夢夢與Ricky離離合合五年，最終分手收場。（資料圖片）

 

　　夢夢15年被爆戀上較她年長19歲的Ricky，愛得轟烈的二人去年正式分手，但因夢夢為太極籌辦今年八月的紅館騷，一度盛傳二人復合。對於新郎不是自己，Ricky回覆本報說：「我梗係知道佢（夢夢）結婚，戥佢開心，恭喜佢、祝福佢！（若夢夢邀請可會出席婚宴？）我就應該唔會去飲啦，去唔去飲都好，我都會做人情畀佢，祝福佢哋。」他回應其他傳媒時，表示數月前已知夢夢婚訊，亦不認識準新郎。其實，早前夢夢接受黃婉曼的網上節目訪問時，坦言當Ricky是哥哥，彼此由情人變家人；至於會否閃婚，她不置可否，但聲言不接受只生小朋友不結婚。昨日夢夢忽然報喜，未知稍後可會再有好消息。

 

轉載自: 晴報

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇