未選已經塵埃落定嘅選舉

　　阿爺悉心為香港打造嘅新選舉制度，由1500人組成嘅選舉委員會打響頭炮，本文刊登之日嘅前一日，即係8月12號，選委會選舉嘅提名期正式結束。政府一共就收到1056份提名表格，當中36個需要選舉產生席位嘅界別之中，得13個係有競爭，其餘23個參選人數目同選舉議席「無多無少」，報名人等緊被公布自動當選。而最爭崩頭嘅一個界別社福界，12個席位講緊都係得23個人去爭，換句話說，所有有競爭嘅席位，都唔使兩個候選人去爭一個，絕對稱得上係「君子之爭」。

（Cally攝）

　　從「遊戲規則」一開始制定以來，其實各路人馬都已經預計到，會有唔少界別係唔使競爭，事關投票人由個人票改為團體票，令到選民人數大減，亦更易喺選舉之前作出協調。睇返連日以來嘅報道，唔同界別都不乏協調嘅影子。

　　Tina聽聞，今次選舉委員會選舉，各界別中如果係有中資機構參與的話，中資喺協調上嘅角色都係非常顯著，甚至係坐喺「主導」角色，由中資發辦選委議席係點樣分布，有別以往除咗被委任以外、盡量少參與香港政治選舉嘅一貫做法。望返選舉候選人名單，中資機構代表超過50人，香港最大嘅中銀集團就已經有15人，呢個仲未包括其他民營企業嘅代表。

　　有被協調嘅政圈中人向Tina透露，中資之所以咁積極參與選舉委員會，據聞係西環一開始就已經做好部署，要求中資機構搵人積極登記做選民，確保有資格成為選舉委員會嘅選民，甚至係準備出選。政圈中人估計，為咗保障「完善選舉制度」之後兩場選舉(立法會選舉同埋特首選舉)「零變數」，西環只能夠相信自己人，所以大量中資代表積極投入今次選舉委員會選舉之中。

　　不過中資代表個個漏夜趕科場，「超人」誠哥就辭官歸故里，呢個又有乜啟示？政圈中人笑言，林鄭就係官到無求膽自大，誠哥呢啲就係真正人到無求品自高，選委會之前只係選特首，畀提名票都係一個人，但依家立法會議員都要由選委會委員簽提名，以誠哥人面，順得哥情失嫂意，倒不如「無票一身輕」，免得過趕呢趟「政治混水」。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票