夫妻相

 

　　香港缺男，眾所周知。

 

　　男人街上大把，我是指可以作為丈夫的原材料。

 

　　在本港，有齊四肢五官的男人已經有成條街咁多嘅女人願意照顧，你想搵個會照顧你的男人，好難咧！

 

　　所以我一位美女朋友嫁了去大陸。

 

　　女友本來瓜子口臉、美人胚子，兩年下來，因為婚姻生活太幸福了，竟然肥了兩個碼。

 

　　丈夫本來國字口面，幾英！也因為沐浴在愉快二人世界中，臉角都圓了。

 

　　如此一來，兩人都向同一方向進發，結果賢伉儷面型相似、眼神相似、動作相似、價值觀亦愈趨統一。

 

　　有諸內形於外，兩人的相真竟有點近似，不是指五官的輪廓分布，而是予人那輕鬆愉悅、勁有默契的感覺。

 

　　她敘述二人的生活片段，簡直羡煞旁人。

 

　　「老公!」她以某種聲線呼喚丈夫。

 

　　「老婆係咪肚餓呢?」他完全熟悉這飢餓的訊息。

 

　　「係好鬼死肚餓呀!」她撒嬌。

 

　　「我即刻煮!」他直奔廚房。

 

　　「你煮乜呀?老公!」

 

　　「麻辣雞、糖醋排骨…啦，」他開始在雪櫃拼命張羅。

 

　　「唔駛咁麻煩，煮碗麵得咧。」她錫住老公。

 

　　「你喜歡濃味嘅餸嘛。」當然係最愛的餸給最愛的你啦。

　　

　　「老公，就嚟餓死咧!」咁厚脂肪，點會餓死呢?

　　

　　「唔怕!有生果、有餅乾，你食住先，唔好餓親。」衹見他滿頭大汗由廚房跑出來，又去張羅。

 

　　「唔食，食咗邊有胃口呢?」她繼續撒嬌。

 

　　「哦!我快手D，即刻就有得食，你睇下電視、打下機先，真係好快就得。」

 

　　若沒有提及電視手機，你還以為是古時的拍烏蠅霉店好不容易等到個大爺幫襯!你在香港幾許見過如此殷勤的飲食服務？

 

　　你可能以為是女的富甲一方，男的委屈相就，唔係噃，他肯定有錢過老婆，除了愛，還有甚麼解釋呢？

 

　　兩人都皮膚勁靚、眼睛會笑。

 

　　皮膚靚的人體貼，要冧一定冧死你。

 

　　眼睛會笑喻示性格樂觀，凡事向好處想，自然不會永遠記住陳年舊事，揭人歷史瘡疤。

 

　　如此組合，婚姻生活自然如魚得水啦，雖然，是兩條肥魚!

 

　　所以，夫妻相處之道，在於衹記對方的好，而非日日互數；又在親暱互冧，而非黑面互片。

 

　　壹Pair肥魚互洒恩愛濡沫，自然滋養出令人艷羡的夫妻相。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇