火氣熾盛 下半年要小心乜?

 　　推開街門，熱浪即撲面而來。

 

　　如此熱爆的天氣，每日出門，都令人聯想到蒸炆燉:

 

　　一.在家中，若不開冷氣，就是清蒸。

　　二.出街跑一圈，簡直是爆炒。

　　三.落水游幾個塘，不就是水煮?

　　四.露天跑步，分明是生煎。

　　五.碌番入屋，正是回鍋!

　　六.大家暴露在艷陽下，記得有時番轉吓，否則煎燶!

　　七.如果你認為自己有五花腩，就小心吸吓油啦。

　　八.當然，可以閃入商場，過吓冷河。

 

　　不過，在炎炎天氣之下，大家要小心冰火兩重天，好容易領嘢架!

 

　　講到冷氣，香港自詡先進，但在空調方面，則有D嘢要向大陸學習，據說國內所有商場，都有溫度控制，要調校至廿多度，但香港則多數係冰河設計，商場冰封，巴士雪罩，所以姊妹們要帶定條薄薄嘅披巾，一感到寒流來襲，立即裹住條頸，前面保護氣管，後面封住風池、風門等穴道（以風冠名，分明係要防風啦），頂住D寒邪。

 

　　今年咁鬼熱，可能係丙申年之故，丙為烈火，乃太陽之火，曬爆!本年特別多山林大火，澳洲、加拿大、美國均已燒山，下半年還不知有甚麼地方中招。

 

 

　　由於丙年火猛，大家要小心:

 

　　一.山林大火

　　二.家中火警

　　三.心中火盛

　　四.話中有火藥味

　　五.國際間有明火或暗燒的格鬥

 

　　猴年立春八字頭上三把火，相信今年一定熱到飛起，好意先生還瞓身tip溫度必破記錄，而且熱之中會有損傷，例如行山中暑、效遊蕩失……等，大家要多小心咧。佢仲話:由於八字中有三個火、三個金，已佔八中之六，五行十分唔平衡，因此天氣亦會失常，唔係好熱就係好凍、唔係大火就係大水，連羅浮宮都差D要浮在水上。還會有地震，今年已經震咗幾次啦，台灣啱啱震完。

 

　　由於有咁多天災加埋人禍(D人心火盛)嘅可能，大家外遊，除避免有印巴西亞呢四個字嘅地方，仲要留意有火之意嘅國家，例如日本(日為火)，不過佢而家咁hit，又咁cheap，你都未必聽得入耳，自己睇路啦!

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇