相學上如何解釋特朗普「浮」入白宮？

　　有一種浮，助特朗普力爭上游。

 

　　從前成功靠持久，現在成功靠把口。

 

　　我哋就研究一下特朗普把口，又真係完全切合其中文譯名——特別、大聲、又冧掂普羅大眾。

 

　　這種姿態作風，極脗合相學上吹火咀的含意。

 

 

　　他的咀型並非典型的吹火咀，因為最普遍的型號應該是唇突口尖，好像吹火的樣子，表現在行為上，誇大好性、喜爭強辯，總之，佢一定啱，你一定錯！

 

　　特朗普的咀型只是有吹火咀的意味，就是說起話來，口部muscles往往聚成一小型圓背，狀若要吹著或吹熄火焰，這咀型加埋其一指擎天，不停指點的姿態，就是競選時的招牌身體語言。夠晒浮，不過選民受。

 

　　吹火咀其實係吹水嘅——有咁大吹咁大，特朗普將語言的震撼力無限擴大、吹出燎亮的soundbites，吸引大量游離、憤怒、不甘的心。

 

　　由於講時輕率，講完可以一係話冇講，一係話你誤會，一係索性180度飄移。

 

　　浮就自然會游，因此他當選之後，已經頻頻轉軚：

 

 

　　一，競選造勢時狂批中國，認為她搶美國人飯碗、操控匯率、又在南海修建軍用機場，對美國的威脅大過伊斯蘭國！當選後與習近平通電話，卻稱讚中國是個偉大的國家。可能佢終於都明白：中國係美國最偉大嘅債主！

 

　　二，最初指責ObamaCare令窮人更難就醫，承諾全面廢除。見完奧巴馬，立即話考慮保留兼改良有些部分。

 

　　三，他最驚人之語是要在美國與墨西哥之間起一長城，阻止墨國偷渡者，他現在說有些地方設圍欄都可以。

 

　　四，對於那些深惡移民的人士，最啱聽係佢話要將一千一百多萬非法移民全部掃地出門，而家就話只軀逐有罪案記錄者。

 

　　輕浮本屬破敗之相，特朗普破過四次產，但都拗腰翻身，而且即將成為全世界最powerful的人，這又怎解釋呢？

 

　　第一， 他的咀是說話時才有吹火咀的形態，並非典型，而且佢笑起上嚟，個口好大，即係此人適應力爆燈，唔發爛渣時，可以好四海，所以就算講過唔算數，大部分時間都可以get away with it。

 

　　第二，他的頭骨和身相較厚，在相學上即有腦兼有福氣籌碼，所以常常絕地逢生，又做大亨。

 

　　有趣的是，他自從當選之後，說話時較少出現吹火咀及金手指的浮誇特徵，反映在言語行為上，已漸漸由狂人變為正常人，再唔係特冇譜咧，唉，原來有啲浮都係假嘅，流嘢，流浮！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇