【愛靚也愛命】堅拒引頸就戮！7招KO高壓推銷醫美殺手

　　凱詩美容因涉嫌非法吸金而瘋狂吸睛，愛美人士又一次要擦亮眼睛咧。其實愛靚甚至可以冇命，呢個就係不少醫學美容事故嘅教訓。

 

　　相信唔少人都曾經畀美容、生髮、健身中心嘅快刀手狂斬，我當然也有豐富嘅被斬經驗啦。要防範，除咗參考消委會嘅建議，仲要喺心理上裝備自己。

 

 

　　作為一個資深受害人，又綜合「老襯」朋輩嘅經驗，我有以下嘅拆解心法：

 

一、戰勝心魔：

 

心魔有二：

 

1.心虛：消費者普遍有信心危機，殺手話你肥咗、殘咗、秃咗，你就立刻跌入信心谷底，任人宰割。

 

2.虛妄：人地話你做完療程，會後生廿載，你又信！

 

二、避免荷爾蒙陷阱

 

　　由於異性相吸，你見到靚仔靚女自然減低防範，提高魅力，其實嗰啲小鮮肉、小鮮奶只當你係一隻肥羊、一隻蠢豬，佢哋全神貫注，只為研究可以劈幾大刀。

 

三、醒覺「忽然」老友

 

　　佢哋可以用好多方法，極速縮短彼此距離，包括扮同情、扮老友、扮為你設想……你唔好以為真，佢哋入行都係因為分賬肥、瞓住賺！

 

四、明白快、靚、正嘅謬誤

 

　　佢哋會不負責任咁推銷。其實髮厚、樣靚、身材正，用入侵性嘅方法或掩眼法，效果當然顯著及快速。不過如果要自然、持久、安全，點都要時間、汗水、意志力嘅。

 

五、打破「尖端」科技嘅迷思

 

　　啲美容院不斷推出新機器、新產品、新技術，好多時都係「搶錢」手段，有行內人同我講，話其實好多機器同產品都差不多，佢哋會好似dum症咁dum療程，話你嘅進展已到plateau，要突破，必須用新武器，其實都係嗰嘢，新嘅只係你嘅傷口！

 

六、向硬淨樣板借力

 

　　有女朋友意志鐵一般堅定，從來唔會因被遊說而「落搭」。我每次畀人推銷覺得唔好意思，就想起「鐵娘子」，有神效。

 

七、小心蒙面奸人

 

　　不少前線人員，甚至一啲有牌執業嘅，都只係睇中你嘅錢，佢哋唯一擔心嘅，就係唔好畀你睇到佢哋奸笑，所以戴口罩好方便。

 

　　呢篇我真係有感而發，由衷奉勸大家：要避免任人魚肉，就要提防扮熟，明察只係個局，一於奮力頑抗，堅拒引頸就戮！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇