【疫下創業】最忌漁翁撒網吸fans！你真的懂用社交媒體嗎？創業新手最常犯的3個錯誤！

　　疫情出現後，保住份工係所有打工仔首要事項，對大部分人嚟講，呢幾年宜守不宜攻。但另一邊廂，近期創業嘅人數亦慢慢開始增加，有的因為被裁員而另覓出路，有的因為睇準時勢，抱著有危便有機嘅心態，希望創一番新景象。但要喺疫情下創業成功，就必要了解創業者初期時3個常犯錯誤。

　　社交媒體雖然係一個非常好用嘅生意平台，但要用得其所先能夠發揮其真正威力。好多創業初哥會過分依賴Facebook／Instagram等為主要宣傳地方，小至賣飾物，大至賣車，都以Facebook內容行銷推廣產品，內容文案、直播等開始十分氾濫。同一間網店內，八成產品都係「店主最愛」、「性價比極高」為噱頭，從無因應該產品嘅目標客群，制定唔同嘅內容策略。亦會因為流行直播帶貨而去不停做直播，無配合品牌形象同實際需要，因此最後將大部分內容變成Content Farm，亦浪費產品宣傳嘅機會。Facebook／Instagram 只係一個工具，策略先係重點，同一件產品需為不同客群定制不同嘅策略及工具，先能夠增加命中率，而非漁翁撒網。

　　所有打工仔都幻想有日能夠成為「CEO」，遇過好多人決定創業後，第一件事就係設計自己CEO嘅名片，會花費好多金錢時間去製作公司Logo同網頁，過分沉醉於自我品牌之中。見過有CEO會用公司產品去宣傳自己、增加個人名氣，而非用自己嘅能力去宣傳公司產品。亦有部分創業初哥會參加眾多嘅Social Gathering，甚至有人同時間租借多個Share Office，希望藉此擴闊人脈，宣傳自己亦為公司尋找商機。其實過分專注自己／公司嘅品牌係創業初哥嘅通病之一，因而忽略生意上其他問題。品牌固然重要，但公司嘅產品／服務更重要，係公司嘅核心。品牌形象有時非一朝一夕，需時間建立同累積，如果創業前期用太多資源建立品牌而忽略產品，會做成「兩頭唔到岸」嘅情況。另外亦唔應該「消費」公司去建立自己品牌，除非你係KOL，否則公司嘅產品就會失去意義，生意難以長線發展。

　　專注產品製作係一件好事，但一定要對產品有多方面了解，先至成功。好多時創業初哥因為太過相信自己產品，而無了解巿場真正情況同客人需要。經常會覺得「我哋蛋糕嘅古早味係最正宗」、「我哋嘅App比其他競爭對手多兩個功能」，但就冇諗過，當所有人都講自己係最正宗時，你嘅「正宗」又如何突圍而出。另一方面，因為太過相信自己產品，只會計算產品可以帶來幾多利潤，而忽略咗產品會令你虧蝕多少，更好少會計劃「Plan B」。最後因為太相信自己，就算估計錯誤亦會不停「磨爛蓆」，錯失翻身機會。

　　逆巿下創業有好有壞，通常初期難以起步，利潤亦比預期少。但如果能捱過初期嘅難關，多數都能享受逆巿帶來嘅能好處，從而最後創出超乎預期嘅成果。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情