2018-05-01

快樂退休－調整心態

　　退休，對很多男性打工族來說，乃一個心理大震盪、大衝擊。因突然間冇咗名銜、冇咗權力、冇咗豐厚月薪、冇咗責任、冇咗寄托－－最弊，冇咗個俾人欣賞、羨慕及妒忌的舞台。一切一切，就會在踏入60歲那一秒消失。這種震盪，經歷過者才領會。

　　不過，正是喊都無謂，反正人人經歷皆如此，一於硬食！然後，調整心態再上路。小弟有幾點經驗，可與男性退休者分享！

　　（一）Back To Basic－－學習享受簡單生活。上班服不用再穿，可天天棉質T恤、方便褲、波鞋走天涯，舒服。車，愈舊愈好，毋須靠佢話俾全世界知「我有幾成功」（純虛榮心！）。揸舊車，不怕俾人刮花甚至撞，連鎖都費事，安心。總之，放棄任何炫耀之心，因層次太低了。

退休後，牛記笠記走天涯，輕鬆

揸爛車，安心不用鎖，刮花不肉痛

　　（二）不妒忌、不認叻、不比較－－與老朋友、舊同學、舊同事相聚，切忌擺出個「我好掂」款。人生行了幾十年，應了解人性及相交之道。別人有成就，誠心鼓鼓掌。自己有成就，毋須放嘴邊。還有，人生路各有不同際遇，退休後應將一切權位利慾之心放下，反璞歸真，大家相聚，純享受友誼，戒絕比較心態。

舊同事相聚，不認叻、不炫耀、不比較、不妒忌

　　（三）勿做辯論隊隊長－－男性愛認叻，愛做英雄，乃天生的。但一個團體內，若人人認叻，人人搶做英雄，就會出現鬥爭、矛盾。中學及大學時，鼓勵辯論，因刺激思考。職場上天天辯論，因為爭奪資源，表現自己，謀取升職加薪。退休後，必須戒戒戒。因為，辯論傷和氣，就算勝出也不會贏到對方的心。所以，任何聚會中，切忌爭拗，尤甚避免觸及政治（我對你錯）、宗教（我真你假）、搵錢（我醒你渣）幾大「關係地雷陣」。相信，人人皆經歷過凡觸及上述話題，就可能出現不歡而散場面。