打工仔日日坐office，「扮工」生活無聊苦悶，最大嘅娛樂梗係喺lunch time公然上網睇片！最近YouTube香港發表2018年回顧，公布咗「十大本地熱門影片」排行榜。男神黃子華果然人氣非凡，憑棟篤笑影片《洗燥》榮登第一名，僅次其後嘅有Coffee林芊妤嘅《特強瘦大腿操教學》。至於深受網友熱捧嘅FHProduction（熊仔頭）就成功以自家創作微電影《緣份》、《我的小鬼兵》及《放棄一個人》搶佔三個名額。

　　以下介紹YouTube香港2018年度十大本地熱門影片，即刻睇下有冇你嘅心水！

第1位：《黃子華 Dayo 2012 棟篤笑 洗燥 01》／黃子華 Dayo Wong棟篤笑—官方頻道

　　香港棟篤笑始祖黃子華今年決定收山，聲稱以後都唔再做棟篤笑，搞到一班粉絲錯愕又傷心。無緣入紅館睇到佢最後一場棟篤笑《金盆(o浪)口》（包括小編）嘅朋友們，只好上網重溫一下「子華神」昔日嘅精彩演出，所以收視爆燈一啲都唔出奇！

　　而呢條片最特別嘅地方係，一開頭就播放黃子華自導自演嘅短片《旋風腿》（劉青雲有份客串！），當時一句「做人冇公關，食屎喇」嘅對白至今仍然係經典。