你還記得「金磚四國」嗎？阿里巴巴早已謀定大計！

　　「金磚四國」一詞係多年前嘅城中熱話，但今時今日已經好少人提記。當年高盛提出由巴西、中國、印度同俄羅斯組成嘅「金磚四國」，50年後可能會超越現時主要強國，成為世界主要經濟體系之一。此言一出，當年好多人立即將自己嘅投資組合同MPF嘅基金成份，都加入金磚四國相關嘅項目。但事隔多年，除咗中國真係較為突出之外，多數投資者較少會將其他國家再納入自己投資組合之內。雖然係咁，但其實有啲投資者一直都冇放棄過呢舊金磚，其中一個投資者就係阿里巴巴。

　　現時印度大約有450萬個阿里巴巴注册用戶，如果唔計中國市場，暫時印度係阿里巴巴第二大嘅市場。其實而家嘅印度，有少少似當年初起步嘅中國，所以早於2015年，阿里巴巴已經開始進入印度市場，以「前輩」嘅身分帶路，為印度引入新經濟。阿里先由科技層面著手，投資e-payment項目，注資約6億美元於印度最大嘅流動支付商務平台Paytm，希望先令大眾養成網上付款嘅習慣，建立一個日常生活嘅必要性，亦為自己喺印度嘅生意建立基礎。

　　其後又投資網上零售店Paytm Mall同BigBasket，物流方面亦有投資當地物流集團XpressBees。過去幾年，一手包辦由網上購物、網上付款到物流嘅一站服務，為打造印度版天貓／淘寶嘅初型作準備。而當物流生意成熟後，長遠仲可以推出其他跨境服務，亦可以為B2B提供度身訂造嘅生意方案等。除此之外，阿里仲有投資網上交易平台Snapdeal及網上售票平台TicketNew，前後多個項目投資金額一共超過17億美元。

　　當然，如果要成功打入印度市場，係有一定難度。印度係發展中國家，擁有人口約13.24億，僅次於中國約13.79億，雖然人口成長速度比中國快，但貧富懸殊非常嚴重。有數據指出，印度一成嘅有錢人擁有約全國七成嘅財富，而且印度人平均嘅消費能力亦較低，長線嚟講網上購物嘅金額同消費者數量未必有好大嘅增長。另一方面，大約少過兩成半嘅印度人有智能手機，而其中三成嘅手機都冇得上網，相信需要一段較長嘅時間先能令e-commerce／m-commerce普及。

　　阿里巴巴嘅投資項目絕對對印度有著深遠嘅影響。雖然未知阿里之後嘅投資策略，但如果順利的話，下一個阿里巴巴將會於印度出現。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇