《Make Money》未來三大「黑科技」投資領域，你部署好未？

　　世界日日變化咁大，每日都話有「黑科技」股推出，真係要追都幾難追，有時候好多新股上市，好多人連業務都未知就入飛先講，可見世界水浸之餘，好多人都尋求未來增長強勁嘅投資項目。正所謂「執輸行頭慘過敗家」，今日《Make Money》就同你分析下未來投資界嘅三大領域，等大家可以理解下世界趨勢，可以好好咁部署資本！

 

（Shutterstock圖片)

 

生物科技：癌症療法迎大變革，「植物肉」解決食物問題

 

 

（Shutterstock圖片)

 

　　生物科技公司目前主要分開兩大部分，其中一部分就係研發癌症免疫細胞療法，皆因癌症藥品療程昂貴，標靶藥市價講緊都數萬至數十萬不等，利潤極之豐厚。不過，癌症藥投入研發成本高，除咗時間長之外，人力及技術成本都極高。而近幾年醫學界都講緊一種「CAR-T」療法，原理係抽取病人血液中「免疫T細胞」進行基因改造，再打入病人體內，以達致消滅癌細胞，而進行相關科技研究嘅公司就有金斯瑞生物科技（01548）等，所以投資者生物科技公司成為好多基金跑贏大市嘅必備武器！

 

　　另一方面，植物肉都係近年來生物科技界提倡技術，原理係提取植物蛋白改造，將佢變成近似真肉口感。你會問，咁同我係齋鋪食「齋滷味」有乜分別呢？呢個就真係技術改革地方啦！好似Impossible Meats會係植物根部抽取血紅素，代替植物嘅動物血紅素，所以植物肉都會有「肉味」，同時纖維結構都同「真肉」類似。目前係美國有上市嘅植物肉公司有「Beyond Meat」公司，股價由幾十蚊炒到百幾蚊，前途無可限量啦！

 

電子科技：雲端打機未來趨勢，互聯網計算機啟動

 

 

（Shutterstock圖片)

 

　　雖然手機同電腦日日新款，但有科技業推斷，手機同電腦功能會越來越縮減，係可見未來會只剩低Input同Output功能，因為未來大部分計算工作都會交畀雲端工作！

 

　　所謂「雲」（Cloud），係一個虛擬儲存空間，透過電腦將資料上傳去伺服器，可以做到節省空間；不過隨著科技發展，雲空間不斷擴充，每GB雲空間成本下降，而智能手機出現更推動「雲」計算能力發展，所以手機同電腦係未來功能會慢慢越來越簡約！而「雲端」同樣衍生好多產業，近年最多人講究係「雲」遊戲啦！其實呢個業務內地好多公司都做緊，包括騰訊（00700）、百度（09888）、網易（0999），所以係遊戲公司必爭之地，目前雲遊戲尚有些少限制，包括點樣保持速度穩定，以及點樣輸出高品質畫面。另外，基於DFINITY的互聯網計算機已在去年12月啟動主網，未來目標係托管全人類的軟件。

 

　　所以，好多業內人士都預計，遊戲同電腦、手機界係呢十年都會再進化，可能真係變成《CyberPunk2077》咁，變到咁虛幻！同時新技術收費都會提高，科技公司實賺到Fat Fat，所以投資遊戲公司會係好多基金投資嘅其中一個重要方向。

 

電動車：發展路線穩定，充電派VS換電派你撐邊個？

 

 

（Shutterstock圖片)

 

　　電動車基本上都成為各個大國積極發展行業，美國更聲稱要起50萬個充電站，英國又話2023年前禁售燃油車，所以各大車行都話積極研究電動車，希望可以盡快量產，你睇作為領頭羊嘅特斯拉股價幾咁硬淨就知道無得輸啦！呢幾年買特斯拉股票嘅投資者都賺到笑，投資電動車公司亦成為未來投資界嘅重點項目之一！

 

　　電動車嘅賺錢模式，除咗本身賣出之外，仲有好多售後軟體服務，好似特斯拉汽車系統附設網上商店，如果想使用某種新功能就要同商店購買解鎖，好似自動駕駛咁，真係賺到你盡！

 

　　不過，雖然電動車係未來趨勢，但有幾個問題仍需解決，第一就係電池充電快極都要45分鐘，如果唔留意電量，出到街行行下無電都幾尷尬，所以快速充電成為電動車技術瓶頸需要突破嘅地方；因此電動車出現另一派別－換電派，到差唔多電池用盡時後，去附近一個換電站換舊新電就完事，不過換電成本唔係特別平，分分鐘貴過打滿缸油。唔知你撐充電定係換電呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇