男性朋友B最近被一位長髮大眼的美女倒追，偏偏他無任何回應，更顯得避忌。

　　「靚女做主動，執到啦。」我不是取笑，是恭喜他。

　　「佢係靚，但性格嚇親我囉。」他猶疑的說。

　　「佢性格OK架。」我認識她一段時間，印象不錯。

　　「過份主動囉！」

　　女人主動不好嗎？平時男追女，持續約會兼表白，男人都怕麻煩，怎會不想跳過這些繁文縟節，直入正題。現在有一大美女積極向他示好，ready就立即一起，省時了事啊？！他避之則吉的模樣，倒讓我開了花生mode。

　　「我對佢本來有啲好感，但主動到嚇親我呀！」他半反白眼的說：「只係見過一次，交換電話就成日要WhatsApp，覆遲啲佢又問長問短，幾個message咁轟炸，夜晚仲成日話要傾電話，我覺得好煩囉。」

　　「都係有興趣先咁主動嘅。」我試著從她的角度解畫。

　　「主動同猴擒兩回事呀喂。」他已沒好氣：「佢仲周不時send自拍相，有張喺床上影嘅都send嚟，著住背心搔首弄姿...唔知想點。」

　　在一旁的我本來想幫口，但聽到細節已差點笑到噴飯，他們才見過一次面，她便立即放馬進擊。初相識未了解對方性格，便又煩又主動，日與夜無間斷的WhatsApp、追問行蹤、深夜講電話，步步進逼可犯了男人大忌。未讓對方感興趣，已令人生厭，怎不教人退避三舍？！文字言語未突破關係，她更急不及待發自拍照，連在床上拍的小露性感照都send，進擊變成「色誘」？急於求愛，隨時讓人誤以為桃色陷阱，嘿。

　　女追男確是有點優勢，猶其外表中上的她來說，該很受歡迎吧？慘在主動得過了火被定位為「猴擒」，對方連喘口氣，思考、幻想的空間都沒有，未發展先反感，自然無下文。

　　追求要懂得拿捏進退，一牽一引的關係才發展-able，女人可以明示暗示，但要有分寸，別過份急進，也別做得太low。