波叔祝卿姐工作順利 卿姐：你需要多過我噃！

　　財政預算案都公布咗兩個禮拜喇！雖說呢份預算案一出惹來唔少罵聲，但係財爺陳茂波（波叔）都係要四出奔走，向各界力sell之餘仲要收集埋各黨嘅意見做「改正」，今日輪到上劉慧卿（卿姐）個網台節目講吓喇！

波叔一聽完卿姐個神回覆之後就笑到咁！

波叔「工作順利」嗎?

　　今日都仲係正月，卿姐就祝波叔身體健康，波叔都回返句工作順利，點知卿姐就即刻神回覆：「你需要多過我噃，阿Paul！」波叔一聽就笑咗，好有同感咁話「都係！」Jenny從波叔個神色，就知佢呢排公布完份預算案，工作有幾咁「順利」啦！

卿姐奪命追魂message 成功約波叔

　　不過財政預算案都過咗咁多日，卿姐今日先搵財爺上嚟吹水，好似有啲遲噃！卿姐都要控訴一下，話個幾禮拜前，即係月頭就搵過波叔，叫佢出嚟㗎啦！不過就一直未有聲氣，所以就喺波叔接受緊電視台訪問嗰陣就whatsapp佢，話：「阿Paul，我而家睇緊你呀！幾時嚟我到（做訪問）呀？」波叔就立即應機喇！所以就促成到今次訪問。

從來沒我份......

　　個個都知今次份預算案一出，好多人都「媽媽聲」，而卿姐一開波都笑波叔，好似當年嘅曾俊華（鬍鬚曾）咁，雖然有大筆盈餘，但係就「全城喊打」，就問波叔仲考唔考慮派錢?波叔就一副心意已決咁嘅款，重覆又重覆咁話唔接受一刀切派錢，又話都係用關愛基金補漏拾遺嘅做法好啲喎！不過，關愛基金不嬲都係用嚟扶貧多，Jenny諗起自己當初見到份預算案嗰陣，睇住寬免差餉冇份、稅又唔係交得多、學生哥張海洋公園飛又唔關小妹事……今次波叔咁大決心唔肯派錢，唔通「改正」之後Jenny都係要唱多次：「從來沒我份，犧牲當做例行，我慣了傷心～～～」？