林鄭繼續喺佢嘅組班路上緩慢前行，噚日（4日）先正式搵咗前入境處處長陳國基埋班，做嘅唔係保安局局長，而係做「大內總管」特首辦主任。其他幾個重要官員，包括政務司長、財政司長同埋律政司長嘅人選，樓梯聲都未見響下。

　　可能組班未有突破，傳媒將焦點放咗喺噚日中午一餐被喻為係「破冰飯局」之上。飯局由建制派召集人廖長江牽頭，建制派出席嘅有民建聯李慧琼同陳克勤、工聯會黃國健、經民聯林健鋒、新民黨葉劉淑儀同埋自由黨鍾國斌；泛民嘅就有民主黨胡志偉、公民黨楊岳橋同埋郭榮鏗。

　　據聞，今次搞呢餐飯局，西環係有事先關注嘅。特首選舉之後，唔少建制派私底下都同西環反映，如果政府同反對派仍然處於有你無我嘅對立面，好難提升林鄭嘅管治水平，更可能會衰過CY。而西環當然明白到，嚟緊香港有唔少極度爭議嘅議題需要解決，包括近嘅有一地兩檢、遠嘅有重啟政改、23條立法，如果仲係用過去幾年嘅鬥爭思維，要搞得好好睇睇嘅機會係零；所以佢地亦都同意，建制派不妨同可以傾計嘅泛民，進行更多嘅溝通。

　　但政界中人分析，西環有兩個根本問題未搞得清。第一，立法會入面嘅對立，只係泛民同特區政府或者中央政府之間嘅對立，建制派充其量都只係政府嘅「爛頭卒」，修補撕裂的話應該由政府去做，例如畀非建制議員有多啲空間發揮，好似多啲委員會主席位讓畀泛民；又或者將來一啲重要議案，要及早同泛民溝通，吸納泛民嘅意見先推出，顯示足夠嘅誠意。

　　其二，泛民或者非建制派光譜太闊，連胡志偉自己都未必代表到民主黨，更遑論要代表晒成個非建制派。雖然出席嘅鍾國斌都話日後可能搵埋其他獨立泛民議員出席，但相信要食完餐飯大家出嚟仲係笑笑口咁回應傳媒，真係唔係易事。

　　一餐飯，要修補撕裂，可以話係天方夜譚，就算話係「破冰」嘅第一步，相信都唔容易。要真真正正修補裂痕、大和解，要睇下林鄭呢個香港人同中央政府之間嘅中間人，點樣發揮到超能力。但林鄭如果真係有超能力的話，早就已經用咗喺埋班度先啦！