法院上周宣判取消四位立法會議員資格之後，焦點有三。第一係政府同立法會，究竟收唔收四位前議員嘅訟費同埋過去近一年嘅薪津；二，就係立法會補選，會唔會如林鄭所講，政府唔會乘人危，定係會捧打落水狗；最後，就係泛民失去咗分組點票直選議席大多數之下，會唔會被建制派成功突襲修改議事規則。

　　Tina唔係唔關注第一同第二個問題，不過第一二條對成個立法會未來嘅生態唔會有大影響；但係第三個，即係修改議事規則，好明顯就會將整個政治圈嘅遊戲規則會有好大轉變，令到反對派嘅抗爭手腕，進一步收窄。

　　雖然Tina叫馬天娜，唔係叫馬後炮，但今次都要褒讚返自己眼光獨到。早在上年11月嘅文章《從釋法看香港最偉大政治家》入面，已經提到DQ議員嘅其中一大任務，就係要修改議事規則，令到立法會重拾秩序。

　　呢個咁大嘅政治任務，隨住再有四位議員被DQ之後再次擺上枱面。Tina聽聞，西環喺上星期五（14日）法院宣判之後，已經即時聯絡個別建制派議員要立法放風要求修改議事規則，先試一試水溫；到當晚集會支持被DQ議員得小貓幾隻之後，西環更加放心，剛剛呢個星期已經集合各個建制腦袋，計劃下一部行動。

　　周三（19日）財委會泛民一連串極之愚蠢嘅拉布行徑，為建制派搭好晒戲棚！民建聯拉隊唔投財委會37A議員議案、建制又唔肯將表決鐘縮到一分鐘，建制嘅目的就係要睇下泛民夠膽點玩。最終議案亦都係大比數獲得通過，出晒口鬧嘅幾位泛民議員，更只係敢投棄權票；而其後幾個重要議程，亦都唔夠時間過。拉布拉出禍，睇睇財委會主席陳健波之後嘅言論，就知道建制派已經出師有名。

　　經過財委會爛尾之後，西環更即時通知全港寫手要配合行動，據聞人大政協已經接晒柯打會先行發功，其他親中媒體，特別係親中網媒，亦會再次複製之前反佔中簽名嘅相類似行動，希望將修改議事規則放喺「道德高地」。Tina估計，下周開始有關修改議事規則嘅宣傳會係浪接浪，Tina只可以話，經過咁多年拉布之苦，建制派無可能唔乘人之危，泛民只可以被人撳住嚟打。