距離聖誕節尚餘不足一星期，女友S急忙找我「夾時間」！

　　與其說是「夾時間」，不如說是「夾口供」才最夠貼切。S手上有三個具備男友潛力的約會對象，但說要選定一個長線發展，她又覺得言之尚早。

　　平安夜、聖誕節、Boxing day……不就剛好三天嘛！即使三人當中分數各有高低，要其中一位大後備等到Boxing day才見面，對方一定覺得不是味兒。S看中了我這位單身女總需要朋友相伴，便決定借我的名字一用；她假意不想重色輕友，訛稱陪我過節，好去安撫分得Boxing day那位大後備。

　　像S這種女生，否認喜歡收兵，卻又遲遲不願選定男友的，最擅長這些耍人技倆。我的角色很簡單，只要記住自己24號開閨蜜X’mas party、25號先來個afternoon tea再去看電影，當日如非必要盡量別外出就可以了。

　　騙來騙去，無非想選出最理想的一個，既然他們在S心裏早有評分，何不乾脆拒絕那些興趣不大的追求者呢？為何尚要花費心神去應酬大後備？

　　「因為……隨時都有預計唔到嘅變數嘛！24號晚約嗰個喺app識，外國返嚟同幾靚仔，但未摸清佢個底究竟花唔花，但見佢約我24號，所以估佢無其他女友，可以date吓。25號嗰個自己搞生意，除咗衣著老土啲、頭髮少啲之外，我哋都傾到偈嘅，喺佢身上會學到少少投資嘅嘢。咁講真，26號嗰個其實我最鍾意㗎，好幽默好低B，一齊嗰時最舒服，不過佢做份文職一個月人工得萬幾咋，將來點生活？但佢話過咗農曆年會轉工喎，我想等埋先！」S說。

　　如此說來，各人早就被放在S的天秤上逐一仔細評分；可惜的是，沒有誰可以將對手重重擊倒。以S的習慣，她是絕對不會斷言拒絕追求者。用她的邏輯思維分析，幾位候選人其實都未理想得令她立定意向，但似乎又不至於差得要淘汰任何一位。

　　「當未有一棵樹值得你為佢放棄整個森林，咁就最好當然係繼續留喺森林啦！」這才是S真正的戀愛格言。編個小小的謊言，就能繼續留住追求者，她無非是希望將森林的版圖無限擴大。

　　愈來愈發覺身邊有很多像S那樣的人，喜歡不喜歡，不必急於表態，只要一直保持觀望態度，用「深度認識中」作安全盾，然後就能自我陶醉於一片桃花園當中。寂寞的時候，隨時可以挑一個出來解悶，享受一場虛構的浪漫。

　　總而言之：「追求者，一個都不能少。」

　　無論如何，我還是祝福S早日找到Mr Right；如此一來，我便再無必要被迫參與她的植樹計劃。