十年一劫似注定（二）

　　上回講到我從不批命、算命、睇相⋯⋯不是不信，而是領悟到人生劇本由天定，提早知道又改唔到，有乜好玩？

 

命運早注定，好的感恩、享受，壞的默認、硬食。(Shutterstock)

 

　　不過唔批唔睇，但一邊活著，一邊感受到劇本逐段發生。例如上文講到，自己逢5或6字尾的年份，就有一劫。最大大鑊為1976年的嚴重車禍，在美國高速公路飛馳中爆軚撞石壆，成個人從大銀幕（車頭玻璃）飛出，粉身碎骨，但奇在死唔去。

 

　　1985年則移錯民，搞到急瘦數十磅，精神極度抑鬱，幸當機立斷立即回港重過新生。又經歷一劫。

 

移民生涯有人快樂地享受，有人痛苦受折磨，我是後者。

 

　　之後，再回香港電台工作，如魚得水順風順水，電視電台兩邊走，不停升職，開開心心地日又做夜又做，周日都唔放假猛做。咁做法，一如汽車，日日谷，再勁的跑車都會谷壞。

 

　　我呢，因日日在咪前直播，也不停主持電視節目及大騷（例如十大中文金曲），再要孭起一個電台的節目總監位，以為自己是超人，終於，1993年開始日日心跳手震，呼吸困難，到1995年左右已接近崩潰邊緣。當年唔知乜病，只知精神陷入極度不振，做乜都無信心（後來才知患上驚恐症與抑鬱症），基於當年醫治情緒病的醫生不多，正是求助無門，惟有苦捱，日日活在惶恐不安中。

 

80年代尾當時得令，不單電視電台兩邊走，更兼任總監又出書，以為自己是超人，結果埋下冧檔的種子。

 

　　能做的，就是拒絕再升級，向上司投降，只主持基本的節目，但因根本無體能，長期只能「趴」住做（即開咪坐好，關咪趴低）。

 

　　拖吓拖吓，再拖10年，終於在2005年正式宣告冧低，再也不能動了。

 

　　精神情緒病好難得到別人的同情，因你看似身軀正常，無傷口無生出不明瘇毒，一切病只在精神系統內發生。試過的會知，患病者會覺得自己長期處身黑暗隧道中，根本不見盡頭，繼續活著只是累人累物的一件垃圾，沒法過正常生活，也當然沒法開心起來。試想想，一日兩日，你可以頂，但一兩個月，甚至一兩年困在無邊痛苦中，怎不有個想法——死咗佢一了百了！

 

網上有相當多我患抑鬱症的報道

 

　　這就解釋到，為何抑鬱症在全球大城市中，高踞自殺原因之首。

 

　　我又如何？幸而找到適當藥物，令自己從深度抑鬱中穩定下來。望望前，還有9年就可退休，決定咬咬牙，捱埋佢。

 

　　終於，2014年甩難退休，一心以為壓力全失，應該可以減去精神藥物及血壓藥。

 

　　點知，步入2015年，又遇一劫。首先是停精神藥3個月之後，「抑鬱病魔」立即來叩門。之後，更杰撻撻，某晚午夜，未能入睡，拿出iPad寫嘢，突然右眼湧出黑雲，從此，下半部失去視力。

 

　　當然急急找醫生，檢查後確認：「曾先生，你右眼中風！」一量血壓，上壓183、下壓110！點解？正因自己減藥，令血壓飆升而搞出禍，立即開始用針打藥入眼去控制病情。呢劫，本來可以令右眼立刻失明。

 

11年前，我自減血壓藥，搞到血壓失控而眼中風。

 

　　殊一聲又過10年，2026年，夠期遇劫喇！今次是無情情在家內滑倒一跌，右後腦輕輕著地，無痛無暈，以為無事，豈料兩周後中風眼出血，充斥眼球，再次「失明」，要急急做手術放血，再用激光補孔。

 

十年一劫，到今年話都無咁準，又中！希望2036年唔中啦！

 

　　過埋今次，「劫數大佬」會否又10年後再拜訪呢？