林鄭月娥公布參選之後，過去一星期應該係最難「過」，一個準領導人唔識用香港發明的八達通入閘坐港鐵、唔知七仔無一兩卷廁紙買，「離地」行徑令香港人咋舌。不過民望唔離地就OK，最新民調顯示林鄭民望大飆7個百分點，同曾俊華差距進一步收窄。

　　有傳媒朋友同Tina講，話西環近一星期有一個重要任務，就係要為林鄭提升形象，而西環更加向不同友好媒體高層取經，睇下有咩絕世好橋。傳媒朋友話，西環依家最擔心，就係曾俊華繼續打西方民主式親民牌，吸到更多市民支持，咁樣對林鄭日後「政權」帶來不穩，亦枉費了勸阻CY連任的功夫。

　　不過，民望呢家野對於選唔選到特首真係同浮雲一樣，捉得住你都留唔住，無實際用途，反而林鄭面對的最大危機，係選委在中共龐大選舉機器開動之後，心入面所產生的不滿與日俱增。作為建制選委，提名票屬於明票，在西環壓力之下當然唔使諗就遞畀林鄭；但據Tina了解，已經有唔少選委有田二少的心態，覺得西環太過霸道，只不過唔敢宣之於口，佢地都諗住只要曾俊華成功入閘，最終係會票投薯片叔叔。

　　有幾多選委有咁樣諗法難以搵到實數，但呢個情況帶來另一個問題，就係提名票多過最後的選票。出現呢個情況將會令西環以至阿爺非常尷尬，亦會引證唔少選委係受壓逼之下先提名林鄭，對日後管治帶來挑戰。現時西環都計緊數，究竟幫林鄭箍幾多張票先係最佳數字，既顯示佢係眾望所歸，又唔會出現提名多過實票。

　　好多人都唔明白，點解今次阿爺可以咁粗暴抵擋同屬係建制的其他候選人，包括埋葉劉淑儀，非要做到林鄭「君臨天下」唔得。其實都好簡單，上一屆選舉由唐唐對CY，造成建制派史上最嚴重的分裂，咩香港營根本無出現過，阿爺見過鬼都怕黑，情願一開始強硬「欽點」一個做特首，以佢好打得同比CY高的民望，為香港帶來出路。可憐一班落場跑的候選人以上屆選舉為基礎，以為阿爺欽點左都可以唔畀佢做，只可以講句「Don't be too simple and naive」。