大家都係成年人，我哋唔再需要 babysitter，尤其想 babysit 你嗰個，係你上司。Out of control 係好多上司 panic 嘅來源，因為未知數會令人心內痕癢，估估下更會引伸無限聯想，令人坐立不安。

　　「係呢 Amy，我叫你覆返 Keith 個 email 寫成點？」上司有意扮無意地問。

　　「頭先啱啱開完第二個會，陣間 send。」作為一個 AM，recap 返一個同 vendor 開會嘅 email 理應綽綽有餘，但畀上司開完會後45分鐘就追問，Amy 覺得有啲不是味兒。

　　「ok，咁你都係用 word 起咗稿先，print 出嚟畀我睇睇，我容易啲改。」上司明顯有備而來，將要求直接講出。

　　唔好唔信，現今世代，除咗中學老師之外，仲有好多人喺辦公室鐘意用紙筆改正下屬嘅「功課」。

　　說到底，鐘意 micromanage 人嘅上司其實都缺乏安全感。無論之前受過咩打擊，或者性格使然，所有嘢佢哋都要知、都要理、都要經過佢哋手先覺得 controllable 同安心。但現實係每人只有 24 小時，一個上司又可以處理幾多個下屬嘅工作？請下屬返嚟嘅意義又何在？

　　「其實你係咪有啲咩要我 take note？如果唔係我諗我可以直接 send 呢個 email。」Amy 斬釘截鐵，將主動權瞬間奪回。

　　面對 control freak，Amy 選擇挺身而出，對自己嘅工作能力投下信心一票，坦誠講出自己認為更有效率、更合邏輯嘅做法，將自己嘅工作 control 返喺自己手。作為上司其實亦需要 control 自己對下屬嘅管理慾，對下屬嘅工作更有信心。揀啱下屬，就好應該選擇信任佢哋。

　　人在職場，大家都已經係成年人，唔再需要 babysitting 之餘，不論上司定下屬、男定女，好多事都需要自己攞返決定權。

　　無論職場定人生，take control 定 out of control，並唔係靠彩數。