男人之家，好心就唔好咁小心眼啦！咩都計住計住。係嘅，生活上好多嘢我哋都好應該大方啲，無謂斤斤計較，之但係每四年清一次嘅呢條數，就點都要計得清清楚楚！

球迷們通常都好專一。

　　雖然我口口聲聲話自己唔係勝利球迷，但支持阿根廷已經廿幾年，諗番轉頭當年鍾意阿根廷，第一個原因就係佢哋有位新晉球星，二來啱啱贏過世界盃，所以當時年少無知咁盲撑阿根廷，某程度都係因為佢哋夠勁，以為日後應該會經常勝利，所以呢段阿根廷愛情故事，開頭都係勝利主導！

　　事實係，捧咗幾年後嘅86年，真係目睹馬勒當拿一手捧走世界盃，咁我哋呢班阿根廷粉絲，就享盡飛上天上嘅快感，不過與此同時，亦正係大家跌進深淵嘅開始。

　　之後嘅阿根廷傷心片段包括：90年老馬帶傷單天保至尊，鋼門加符碌入決賽，但奸有奸輸；94年加埋巴迪高一開個勢雷霆萬鈞，直到老馬被驗出服用禁藥即out，成隊謝晒！98年人腳齊全入八強，又多得奧迪加無端端攞紅牌，比荷蘭一個突擊伯金世界波收你檔；02年大熱身份踩入死亡之組，竟然分組賽出局，再見巴迪高；06、10年開得唔錯順風順水，直到八強遇著剋星德國！

　　卒之，今屆終於能夠再次入四強，多得美斯正式大個仔孭起隊波，加上走線係有運，作為等咗24年嘅fans，其實已經心滿意足，勉強要加個願望的話，就係希望阿根廷能夠有場代表作啦，之前幾場波都只係啱啱夠贏，無乜霸氣囉！

轉載自晴報