新政府上咗場差唔多一個禮拜，司局長、行會成員嘅名單都一一公布咗喇，估完領袖，大家又轉咗去估副局。Jenny之前都聽過幾個副局長人選，除咗最大迴響、畀泛民鬧到飛起嘅教育局副局「大熱」蔡若蓮外，Jenny今日就同大家講吓傳聞中財經事務及庫務局副局人選──自由黨嘅陳浩濂，佢可謂另一個「傳奇」。

極速「上位」入黨兩年就「出征」

　　故事由2011年區議會山頂選區出現爆冷賽果開始。當時一個其貌不揚嘅「四眼仔」竟然擊敗咗公民黨明星陳淑莊（Tanya）當選，搞到Tanya因為咁響人前喊咗兩次，呢個「四眼仔」就係陳浩濂喇！

　　陳浩濂係「華仁仔」，小小分析員做到渣打銀行高層，家中有個「官爸爸」前路政署助理署長陳兆安，家住半山出身名校，個Package就咁睇真係唔錯㗎！喺2009年嘅時候加入自由黨之後極速「上位」，無耐已經成為田北俊愛將，2011年已經被派出征區議會撼Tanya，仲贏埋返來，都咪話唔威風！上年仲想做埋立法會功能組別議員添！不過，最後都係輸咗畀經民聯嘅林健鋒。而家陳生應該又好似劉江華咁敗部復活嚕。

玩「專一」不如做「俊傑」

　　識得喺政界扶搖直上，陳浩濂有句金句就係：「事業上位同追女仔一樣，要有興趣同專一！」睇來呢個「追女上位術」確係使得，如果唔係點會成為副局長「大熱」呢！不過，Jenny就想問佢個「專一」，係畀咗邊一個呢？皆因3月特首選舉嗰時，佢係跟住師傅田少力撐John Tsang㗎噃，一個轉身就入咗林鄭班子？所以話，從政玩「專一」不如做「俊傑」，識時務者為俊傑呀！另一方面，今次林鄭如果真係搵佢做副局，明顯就係為咗展示自己嘅政治氣量，想做一個「大和解」氣氛。

　　當年做投行嗰陣每日成交額閒閒哋幾億上落，又做過幾間銀行，做財庫局應無咩難度，Jenny到而家都暫時未聽到有財金界人士「咋型」，相信佢做得成副局嘅機會都好高！

頭馬「升呢」做官 田大少朝中有人好辦事？

　　有人歡喜有人愁，陳浩濂「升呢」做官，佢師傅田大少真係唔知應該開心定痛心喇！皆因頭馬入咗政府，所謂朝中有人好辦事，但另一方面一手培植嘅人才被林鄭一句「唔該」就撬走咗，要去邊度搵返同樣Quali嘅人做接班人確頭痕。

　　By The Way，陳生年紀輕輕得四張，仲要就嚟做副局長，應該係唔少中女心目中嘅「筍盤」！不過So Sorry！人哋已經「名草有主」喇，而且老婆大人仲係中學時代就識嘅添！大家可以慳返啖氣喇！