民主黨正副主席同幾位中委今日舉行新春團拜，其中3位正副主席胡志偉、尹兆堅同羅健熙仲親自下廚，炮製咗3味有意思嘅菜式，話要向政府官員聊表心意喎！不過食嘅就係Jenny同埋一班傳媒好友，唔知啲寓意傳唔傳達到去高官度呢？

　　打頭陣嘅就係主席胡志偉（志偉），佢就整咗一味煎蘿蔔糕，取名為「長者年齡唔好推糕（高）」；而副主席尹兆堅（阿尹）就整咗黃金蝦，叫「老人家都敢蝦」。兩位嘅食字功力真係……Jenny都唔知畀咩反應好。

　　志偉話，而家仲有好多政策都用60歲做分水嶺，好似申請公屋咁，60歲都已經歸為長者申請人，擔心推高長者年齡會有一連串嘅反應，其他社會政策可能會受牽連，認為要鼓勵長者就業，應該用返鼓勵嘅方式。阿尹就話要用黃金蝦提林鄭，香港已經很有錢，唔應該再「蝦老人家」。

　　至於另一名副主席羅健熙就整咗味「紅椒司炒魷魚」，原來係用嚟諷刺律政司司長鄭若驊，希望佢快啲退下火線。佢之後仲即席揮毫，寫返張對聯呼應吓添！

　　雖然民主黨嘅食字技巧同佢哋黨一樣有返咁上下年紀，不過好彩佢哋嘅烹飪技巧就真係有返咁上下。民主黨創意媒體部長黎敬瑋就話，志偉同阿尹其實成日入廚房，所以佢哋嘅廚藝都有保證嘅！果然Jenny同一眾行家都冇食到肚痛，唔使驚加重急症室負擔喇！