四年一屆嘅新界鄉事委員會選舉正在進行中，唔好睇小呢個選舉呀！佢係被形容為可以「左右大局」、影響下屆特首誰屬！佢同區議會選舉唔同，係會選差唔多成個月㗎！而今日就係重頭戲之一，元朗屏山鄉鄉事委員會選執行委員會、主席、首副主席及副主席喇！

有人反口 有人嬲嬲

　　點解話今日係重頭戲呢？因為之前同何君堯齊齊發表驚為天人嘅「殺無赦」言論嘅現任主席曾樹和，今次就受到「新丁」坑尾村原居民代表鄧志強挑戰。Jenny聽講，今次咁好睇，係因為曾樹和話過做兩屆鄉頭之後，就會交棒畀首副主席鄧達善，之但係鄧達善冇興趣接棒，所以曾樹和又出嚟選，鄧志強就覺得曾樹和反口，就嚟同佢「鍊過」！

　　大家都是圍村人，兩位喺今次選舉入面嘅勝算都係一半一半㗎咋！之但係有消息人士就話，其實仲有一位村長都想選主席㗎，跟住呢幾日就有「曾營」嘅人說同佢合作，互相投對方選執委，點知今朝出執委結果嗰時，呢位村長竟然冇份噃！即係連主席都冇份選啦！呢位村長就嬲嬲地，投對家算數。結果鄧志強就僅僅以一票之差，KO曾樹和啦！

　　鄧志強知道自己贏咗之後，笑到見牙唔見眼，仲興奮到即場同老婆咀咀添！之後佢接受傳媒訪問時就笑住話今次係險勝，但係「贏就得啦，一票就夠啦！」，Jenny隔住個Mon都Feel到佢有幾飄飄然呀！