《魚缸博客》明星富豪嘅婚前協議，到底簽咗啲乜？

　　《魚缸博客》前排Taylor Swift同Travis Kelce搞咗個世紀婚禮。成千個賓客，打機抽獎，卡地亞手錶、香奈兒手袋滿天飛，壓軸仲有架古董車，埋單三千萬美金。但大家茶餘飯後討論最多嘅，反而唔係個婚禮有幾豪，而係佢哋份婚前協議。

　　講到婚前協議，好多人第一反應就係「算到盡」、「唔信愛情」。但睇真啲，呢份文件對明星富豪嚟講，根本係商業社會嘅標準操作。今日就同各位缸邊友拆解下，呢班頂級有錢人嘅婚前協議，到底簽咗啲乜。

　　Taylor Swift同Travis Kelce嘅婚前協議傳聞長達40頁。內容除咗涉及Taylor約20.77億美元資產安排，仲有一條「壞男孩條款」，若果婚後出軌，每次罰2000萬美元。仲有一條幾有趣：禁止Taylor在離婚後創作、錄製或公開表演同婚姻破裂有關嘅歌曲。即係話，未來我哋可能聽唔到新嘅「分手歌」。

　　睇完上面案例，大家可能會問：簽婚前協議，係咪代表唔信對方？其實又未必。佢哋選擇簽協議，與其話係「防對方」，不如話係「防命運」，萬一有咩事，大家都唔使為錢反枱，大家嘅生活質素唔會跌。

　　正如有法律界人士所講：婚前協議唔係對感情冇信心，而係對人性有清醒嘅認知。愛情還愛情，商業還商業。將最現實嘅條款寫進最浪漫嘅承諾入面，或者先係成年人對婚姻最負責任嘅做法。

　　喺呢個離婚率愈嚟愈高嘅年代，與其話婚前協議係「算到盡」，不如話係一種「風險管理」。畢竟，有幾多對夫妻當初山盟海誓，最後都係為錢反面？與其等到嗰日先嚟爭崩頭，不如一早畫好條線，呢個就係富豪們嘅婚姻智慧。

《編者按》本欄搜羅即市傳聞，惟消息未經證實，《經濟通》亦不保證內容之準確性。