《魚缸博客》政府用人民幣支付開支等於衝擊聯繫匯率？真係笑死我

　　《魚缸博客》特首李家超公布香港回歸以嚟第一份五年規劃，以及2026年施政報告。金融部分嘅核心，就係一句話：強化香港作為全球最大離岸人民幣業務樞紐嘅功能。

　　當中可以拆成四大範疇。第一，增加流動性。人民幣業務資金安排嘅額度，擴至5000億元人民幣，貸款年期延長至3年。金管局會推出7天離岸人民幣流動資金投標機制，仲會研究發行離岸人民幣短期債務工具，完善離岸人民幣利率曲線。第二，擴闊產品供應。港交所會推出「港交所離岸人民幣債券指數」，作為ETF掛鈎標的。政府會爭取國家財政部增加在港發債規模同頻率，鼓勵政策性金融機構來港發債。第三，推動人民幣櫃台納入港股通。呢個係最直接嘅一步，鼓勵內地同國際投資者用人民幣作為投資貨幣，同時促使更多上市公司設立人民幣櫃台。第四，政府帶頭用人民幣。規劃明確講咗：積極推動人民幣作為政府嘅支付貨幣，研究喺更多合適場景下以人民幣支付政府開支。

　　講到呢度，大家最關心嘅問題嚟喇：政府用人民幣支付開支，即係點？消息人士講得好清楚：唔包括向公務員出糧。目前政府每月平均支付約2000萬元人民幣嘅經常性開支，主要涉及公務員北上培訓、廣東計劃下嘅高齡津貼同長者生活津貼等。

　　有分析就話，政府自身「用人幣」嘅實際意義，唔止於財政技術安排，而係向市場發出一個清晰信號，人民幣喺香港嘅應用場景，由投資層面延伸到公共財政層面。人民幣喺香港搞得咁大陣仗，聯繫匯率制度會唔會受影響？有人甚至話衝擊聯繫匯率？真係笑死我。

　　講到底，五年規劃同施政報告嘅人民幣措施，唔係要取代聯繫匯率，而係要為香港增加多一個貨幣支柱。因為聯匯制度有必要保留，但人民幣亦有機會成為另一個貨幣支柱，因此香港要加快人民幣國際化步伐。

　　換句話講，香港嘅策略係「食兩家茶禮」：港元繼續掛美元，維持金融穩定；同時大力發展離岸人民幣業務，食住人民幣國際化嘅紅利。兩者並行不悖，反而相輔相成。政府帶頭用人民幣支付，雖然唔涉及公務員薪酬，但象徵意義大於實際金額。當政府都肯用人民幣找數，企業同市民對人民幣嘅接受程度自然會提高。

　　聯匯制度改革係一個長遠議題，唔會喺呢一兩年發生。但如果美元信用持續下滑，呢個討論會愈來愈大聲。

《編者按》本欄搜羅即市傳聞，惟消息未經證實，《經濟通》亦不保證內容之準確性。