《魚缸博客》神州喺沙特發行20億美元債，香港可買好過擺銀行？

　　博客今日就唔講股票，因為有單新聞更值得同大家分享。

　　話說中國最近係沙特發行20億美元「主權債」（sovereign bond），呢件事每個地方都有唔同解讀，有內地博主話中國取代美聯儲發債，博客覺得有點兒吹大咗，首先主權債其實只係用「政府信用」做擔保嘅債券，其次呢次發債最弔詭嘅係：用美元計價。

　　如果內地政府真係想籌旗，第一唔會用美元，第二唔會籌咁少。事實上，中沙越行越埋，連香港都可以分一杯羹，喺金融上為國家出力，歸根究柢係沙特想擺脫美國控制之餘，同時亦向美國表示自己唔止得一個合作夥伴，有點想「鷸蚌相爭」感覺，但沙特係咪做到漁人呢？

　　呢次中國喺沙特發行美元債引發外界關注，係因為「超額認購」好多倍，20億美元金額，竟然可以有超額認購到400億，即係話呢種美元債係國際上不論投資者定主權國都好受歡迎。背後原理，有人認為係同「美元廢紙論」有關。

　　簡單來講，一個貿易順差國，製造好多貨品賣去美國，賺取美元外匯，但本身拎住美元，你又買唔到美國軍備、高科技產品，又或者買完都係有好多剩，好似中東咁，整大量石油出口到歐美，拎住堆美元買完軍備，仲有好多錢剩，一旦美元貶值就會導致國家財富縮水。當然沙特可以買返美國國債維持貨幣通脹，但某程度上美國又印銀紙俾返沙特當找數，呢種「閉環」操作，即係美國透支國家信用「零元購」石油，沙特拎住一堆美元卻陷入資產荒。

　　而家中國出手做一個類似「中間人角色」，拎住沙特接返來嘅錢，可以借出去俾想要美元嘅國家賺息差；而沙特又可以賺番啲利息。財政部話，呢筆主權債嘅發行利率較同期限美國國債利差分別為1個基點和3個基點，創美元債券市場最低利差紀錄。

　　你會問，咁沙特自己發美元債咪得，駛咩經中國？咁又變成另一個國際政治問題：挑戰美元霸權。用美元計價發美元債唔係流入美國，即係同緊美國講我而家借你間屋做生意，但唔想交租俾你，係目前呢種國際政治氣氛底下，確實只有中國唔怕美元霸權，而又唔怕會發生違約，畢竟中國目前持有最大金額美國國債同美元外匯。

　　所以呢單「20億美元債」看似簡單，其實背後有一種金融政治博弈味道喺度，而最最最最最重點係，呢筆美元債會喺香港同沙特兩邊上市，3年期4.284%，5年期4.34%，好過放係銀行，真心。

《編者按》本欄搜羅即市傳聞，惟消息未經證實，《經濟通》亦不保證內容之準確性。