RSS訂閱 你睇到標題，梗係以為博客係到搞緊Gag，博客係真心的。
美的呢次上市，已經打晒開口牌：「為海外擴張做好充分的準備」。事實上你仲以為中國電器仲好似二十年前以「平」打出天下，你就大錯特錯。「平」就一定，關鍵係美的電器QC一路上緊，例如早幾年收購日本東芝、又買埋瑞士Arbonia AG，目的除左吸收其他電器公司製作水平之外，更係懶得開拓市場，不如直接買個市場就算。
中國企業用「銀彈」呢招並唔係新鮮事，好似騰訊(00700)都係不停透過海外併購，成為今日遊戲界一哥；其實中國電器出海一路都有好成績，好似海信(HISENSE)電視機已經係歐美有自己市場，平靚正頂死晒其他電視機品牌。
美的想出海，有乜搞作？博客估計，其中一個市場係想做歐美冷氣機市場。美的最出名就係冷氣，而歐美本身安裝冷氣機價格昂貴，唔係部機貴，係安裝手工費貴，係法國德國英國呢種地方，買機連安裝分分鐘兩三萬蚊港紙走唔甩，加上又有一堆環保政策，所以冷氣機安裝量少。
呢個市場基本上暫時未有人做到，不過而家歐洲成日耐唔耐就話三幾十度，得把風扇都真係會熱死人，如果平平地裝返部冷暖調節機，冬暖夏涼咁，歐洲人都未必見識過我地祖國冷氣機發展幾成熟。
美的係咪真係想下呢盤棋？博客就拭目以待，雖然話美的負債率係幾高，但同時公司營收都高，所以上市係咪為集資做主要目的，博客覺得一半半啦。短線內博客覺得股價上過百都係有機會，畢竟國內龍頭電器商，呢個都係基本啦下話？
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
